Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 363 Hüküm no: 442 Orijinal metin no: [90b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mukataacı Ali Efendi vakfı mütevellî kaymakamı Mehmed Efendi’ye Kadı Abdullah Efendi tarafından rehin bırakılan eşyanın geri alındığı Ahz u kabz. Mahmiye-i İstanbul’da İskender Ağa mahallesinde sâkin fahrü’l-kuzât Abdullah Efendi b. Mustafa nâm kimesne meclis-i şer‘-i şerîf-i enverde merhûm Mukāta‘acı Ali Efendi nâm sahibü’l-hayrın nukūd-ı mevkūfesine kāimmakām-ı mütevellî olan bâ‘isü’l-kitâb Mehmed Efendi b. Hüseyin nâm kimesne mahzarında ikrâr ve takrîr-i kelâm edip târih-i kitâbdan sekiz sene mukaddem mal-ı vakf-ı mezbûrdan olmak üzere mütevellî-yi merkūm bana yüz yirmi beş guruş idâne ve teslîm ben dahi istidâne ve tesellüm ve ahz ve mesârifime sarfla istihlâk edip meblağ-ı mezbûr zimmetimde deyn olmağın eşyâ-i memlûkemden ber-vech-i tahmîn miskāli yüz akçe kıymetli yirmi altı miskāl iki yâfte [bâfte] altın kuşak ile iki bin dört yüz akçe kıymetli bir altın yâkut yüzüğümü meblağ-ı mezbûr mukābelesinde kendiye rehin vaz‘ ve teslîm ol dahi irtihân ve kabz ve kabûl etmişidi. Hâlâ meblağ-ı mezbûr yüz yirmi beş guruşu kendiye tamamen def‘ ve teslîm ol dahi yedimden ba‘de’l-kabz bâlâda mezkûr kuşak ile yüzüğü bana def‘ ve teslîm ben dahi yedinden ahz u kabz edip husûs-ı mezkûra müte‘allika bir birimiz ile vechen mine’l-vücûh ve sebeben mine’l-esbâb kat‘a da‘vâ ve nizâ‘ ve husûmetimiz yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 19 Muharrem sene [1]144. Şuhûdü’l-hâl: Fahrü’l-kuzât Mehmed Efendi, el-Hâc Ali b. Abdullah, el-Hâc Hızır b. el-Hâc Ali, Yağlıkcı Musa Ağa, Mustafa Efendi hatîb-i Nişancı, Mustafa Efendi b. Mustafa, Molla Hüseyin b. Mehmed, Molla Ali b. İsmail, Berber Yusuf Çelebi.