Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 365 Hüküm no: 445 Orijinal metin no: [91a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’ya kefil olan Süleyman Ağa’nın ödediği kefalet bedeline karşılık Selim isimli Arap köleyi alarak sulh olduğu Sulh. Husûs-ı âti’z-zikrin mahâllinde ketb ve tahrîri için savb-ı şer‘-i şerîfden irsâl olunan Mevlânâ el-Hâc Mustafa Efendi mahmiye-i İstanbul’da Acem Ağa mahallesinde sâkin Za‘îm Mustafa Ağa’nın menziline varıp zeyl-i kitâbda muharrerü’l-esâmî Müslimîn mahzarlarında akd-i meclis-i şer‘-i kavîm eyledikde mahmiye-i mezbûrede Elvanzâde mahallesinde sâkin bâ‘isü hâze’l-kitâb Süleyman Ağa b. Abdullah b. Abdurrahman tarafından husûs-ı âti’l-beyânı ikrâra vekîl olduğu Köse Hasan Çavuş b. Cafer ve Ahmed Ağa b. Mehmed şehâdetleriyle vekâleti şer‘an sâbit olan Mehmed Ağa b. Mehmed meclis-i ma‘kūd-ı mezkûrda medîne-i Edirne’de Hoca İvaz mahallesi ahâlîsinden olup mahmiye-i mezkûrede müsâfiren sâkin Mustafa Ağa b. eş-Şeyh Mehmed Efendi mahzarında bi’l-vekâle ikrâr ve takrîr-i kelâm edip târih-i kitâbdan beş sene mukaddem gāib ani’l-meclis Halil Efendi b. Abdullah nâm kimesneye mezbûr Mustafa Ağa’nın cihet-i deyn-i şer‘îden beş yüz otuz guruş zimmetinde edâsı lâzım deyni olup meblağ-ı mezkûr müvekkilim mezbûr Süleyman Ağa kefâlet-i sahîha-i şer‘iye ile bi’l-emr ve’l-kabûl kefîl olmağla meblağ-ı mezkûru müvekkilim mezbûr merkūm Halil Efendi’ye kefâletine binâen ba‘de’l-edâ müvekkilim mezbûr meblağ-ı mezkûr beş yüz otuz guruşu mezbûr Mustafa Ağa’dan taleb ve da‘vâ eyledikde ol dahi cevâbında müvekkilim mezbûr Süleyman Ağa iki yüz yetmiş guruş kıymetli üç bin üç yüz altmış vakıyye duhan def‘ ve teslîm eyledim deyü def‘le mukābele edicek ba‘de vukū‘ı’n-nizâ‘i’l-münâza‘a beylerine muslihûn tavassut edip müvekkilim mezbûr Süleyman Ağa’yı da‘vâ-yı mezkûresinden mezbûr Mustafa Ağa ile yüz yetmiş guruş kıymetli Selim nâm Arab gulâmı üzerine sulh eylediklerinde ol dahi sulh-ı mezkûru ba‘de’l-kabûl ve bedel-i sulh olan gulâm-ı mezkûru mezbûr Mustafa Ağa yedinden bi’l-vekâle ahz kabz eylediğimden sonra husûs-ı mezkûreye ve beynimizde ma‘lûm Yusuf nâm gulâma ve târih-i kitâba gelince sâir beynlerinde cereyân eden ahz u i‘tâ ve mu‘âmelelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan her biri âharın zimmetini ibrâ ve ıskāt eyledi dediğini mahâllinde ketb ve tahrîr ve ba‘dehû ma‘an ba‘s olunan Çukadâr Molla Mehmed b. ( ) ve Muhzır Yakub ile meclis-i şer‘a gelip inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-işrîn min-Muharremi’l-harâm li-sene erba‘a ve erba‘în ve mie ve elf. Şuhûdü’l-hâl: eş-Şeyh İbrahim Efendi b. Hasan Efendi, Süleyman Çavuş Ağa b. Mustafa, Mehmed Çavuş b. ( ), Veliyüddin b. Yakub, Berber Yakub b. ( ).