Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 366 Hüküm no: 446 Orijinal metin no: [91a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi’nin bahçe davasından dolayı Berber Hasan’da alacağı olduğu Vilâyet-i Anadolu’da medîne-i Kastamonu ahâlîsinden olup mahmiye-i İstanbul’da müsâfiren sâkin umdetü’l-kuzât bâ‘isü’l-kitâb el-Hâc Ahmed Efendi b. el-Hâc Ali Efendi meclis-i şer‘-i şerîf-i enverde medîne-i mezkûre ahâlîsinden olup mahmiye-i mezbûrede ber-vech-i âtî müsâfiren sâkin Berber Hasan b. Hüseyin mahzarında üzerine da‘vâ ve takrîr-i kelâm edip mezbûr Berber Hasan medîne-i mezbûrede vâki‘ hudûd ve sınırı ve müştemilâtı beynimizde ma‘lûm bahçe arsası da‘vâsıʼçün bundan akdem benimle husûmet ve Kangırı [Çankırı] ve Ankara vâlîsi vezîr-i rûşen sa‘âdetlü semâhatlü Ali Paşa hazretlerine hitâben ısdâr eylediği fermân-ı âlî mûcebince müşârün-ileyh tarafından yirmi nefer levendât tâifesiyle çukadârlarından es-Seyyid İbrahim Bölükbaşı mübâşir ta‘yîn ve husûs-ı mezkûr için bâ-fermân-ı âlî müvellâ ta‘yîn buyrulan Kangırı [Çankırı] Kādısı Osman Efendi huzûrunda zikrolunan mübâşir ma‘rifetiyle ba‘de’l-mürâfa‘a hakk-ı yedimde ve mezbûr Berber Hasan’ın da‘vâsı şirret ve lağv olduğu lede’ş-şer‘i’l-enver zâhir ve müte‘ayyin ve kıbel-i şer‘den yedime hüccet birle der-i devlet-medâra arz ve i‘lâm olundukdan sonra ehl-i örfün yedimden aldığı üç yüz altmış guruş ücret-i mübâşiriyye ber-mûceb-i fetvâ-yı şerîfe mezbûr Berber Hasan’dan [tahsîli] lâzım gelmekle meblağ-ı mezbûru merkūm Berber [91b] Hasan’dan taleb ve da‘vâ ve edâsına hükm-i şer‘î lâhık olmağla tahsîli için zâbitine teslîm ve bir mikdâr habsolunup mezbûr Berber Hasan meblağ-ı mezbûru hâlâ edâ etmemekle suâl olunup meblağ-ı mezbûr üç yüz altmış guruşu bana edâ ve teslîme mezbûr Berber Hasan’a tenbîh olunması matlûbumdur deyü mazmûnları min-külli’l-vücûh takrîrine muvâfık fetvâ-yı şerîfe ve hüccet ve arz ibrâz edicek gıbbe’s-suâl ve akībe’l-inkâr müdde‘î-yi mezbûrdan ber-vech-i muharrer müdde‘âsını mübeyyine beyyine taleb olundukda udûl-i Müslimînden ve medîne-i mezbûre ahâlîsinden olup mahmiye-i mezbûrede Çukurhan’da müsâfiren sâkin Şem‘dânî Molla Mehmed b. Mehmed ve Müftihamamı kurbünde sâkin Hâfız Ali Efendi b. Abdullah nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka mezbûr Berber Hasan mûmâ-ileyh el-Hâc Ahmed Efendi ile beynlerinde ma‘lûm bahçe husûsiʼçün Kangırı [Çankırı] ve Ankara vâlîsi sa‘âdetlü vezîr-i mükerrem Ali Paşa hazretlerine hitâben ısdâr eylediği fermân-ı âlî mûcebince müşârün-ileyh tarafından yirmi nefer levendât ile çukadârlarından es-Seyyid İbrahim Bölükbaşı mübâşeretiyle bâ-fermân-ı âlî müvellâ ta‘yîn buyrulan Kangırı [Çankırı] Kādısı Osman Efendi huzûrunda lede’l-mürâfa‘ati hak mûmâ-ileyh el-Hâc Ahmed Efendi yedinde olduğu zâhir ve mezbûr Berber Hasan’ın da‘vâsı şirret ü lagv-ı mahz olduğu müte‘ayyin ve kıbel-i şer‘den yedine hüccet ve der-i devlet-medâra arz ve i‘lâm olunup ehl-i örfün mûmâ-ileyh el-Hâc Ahmed Efendi yedinden aldığı üç yüz altmış guruşu ber-mûceb-i fetvâ-yı şerîfe mezbûr Berber Hasan’dan lâzım gelmekle mûmâ-ileyh el-Hâc Ahmed Efendi meblağ-ı mezbûru Kastamonu Kādısı Ali Efendi huzûrunda ba‘de’d-da‘vâ ve’l-hükm tahsîli için zâbitine teslîm ve bir mikdâr habsden sonra mezbûr Berber Hasan meblağ-ı mezbûrun edâsıʼçün istimhâl etmeğin mehl-i şer‘î birle imhâl etmişidi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde medîne-i mezbûr ve hân-ı mezkûr ahâlîsinden Mehmed Ağa b. Şa‘ban ve el-Hâc Mehmed b. Hüseyin ve el-Hâc Mehmed b. Veli ve Mustafa Beşe b. Şa‘ban ve Ömer Bey b. Mehmed ve el-Hâc İbrahim b. el-Hâc Mehmed ve es-Seyyid Mehmed b. Abdülkadir ve Mehmed Bey b. Mehmed ve el-Hâc Süleyman b. Osman ve el-Hâc Halil b. İsmail ve es-Seyyid İbrahim b. Mustafa ve el-Hâc Mustafa b. Abdülkadir ve el-Hâc Ahmed-i Şâmî ve Hüseyin Çelebi b. Ömer nâm kimesnelerden şâhidân-ı mezbûrânın keyfiyet-i hâlleri tefahhus olundukda her biri adl ve makbûlü’ş-şehâdedir ve lev-aleynâ deyü mezbûrânın salâh-ı hâllerini ve mezbûr Berber Hasan’ın şirret olduğunu ihbâr etmeleriyle emr-i ta‘dîl ve tezkiye tamam ve şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 18 Muharrem sene [1]144. Şuhûdü’l-hâl: el-Hâc Ebûbekir b. Ömer, İsmail Çelebi b. el-Hâc Mustafa, Molla Hasan b. Mustafa, İsmail Çelebi b. Mehmed, Mustafa b. Mehmed, Mehmed Çelebi b. Süleyman, Mehmed b. Ramazan.