Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 367 Hüküm no: 447 Orijinal metin no: [91b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kilârî Ahmed Efendi’nin Mimarsinan mahallesinde bulunan evini istiğlâl yoluyla Ahmed Efendi’ye sattığı İstiğlâl. Husûs-ı âti’l-beyânın mahâllinde ketb ve tahrîriʼçün bi’l-iltimâs savb-ı şer‘-i enverden Mevlânâ Müezzinzâde Mehmed Şeyhî Efendi irsâl olunup ol dahi mahmiye-i İstanbul’da Tevkī‘î Cafer mahallesinde sâkin fahrü’l-kuzât Kilârî Ahmed Efendi b. Osman’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde mahmiye-i mezbûrede Mi‘mâr Sinan mahallesinde sâkine olup zât-ı ma‘rifet-i şer‘iye ile mu‘arrefe olan Âişe bt. el-Hâc Ahmed nâm hatun meclis-i ma‘kūd-ı mezbûrda işbu bâ‘isü’l-kitâb mûmâ-ileyh es-Seyyid Ahmed Efendi mahzarında ikrâr ve takrîr-i kelâm edip yedimde mülküm olup mahalle-i mezbûrede vâki‘ bir tarafdan İbrahim Efendi menzili ve bir tarafdan merhûm Tosyavî Mustafa Efendi veresesi menzilleri ve ba‘zen eş-Şeyh Hamzazâde Efendi menzili ve bir tarafdan tarîk-ı âm ile mahdûd hâriciyesinde üç bâb fevkāni oda ve dehliz ve bir kenîf ve tahtında iki kepenk dükkân ve dâhiliyesinde fevkāni üç bâb oda ve bir sofa ve bir kenîf ve bir kilâr ve bir matbah ve bi’r-i mâ ve eşcâr-ı müsmire ve gayr-ı müsmireli bahçeyi müştemil menzilimi müşârün-ileyh Ahmed Efendi’ye bi-tarîkı’l-istiğlâl beş yüz otuz beş guruşa bey‘ ve teslîm ol dahi ber-vech-i muharrer iştirâ ve tesellüm ve kabz eylediğinden sonra semeni olan meblağ-ı mezbûr beş yüz otuz beş guruşu mûmâ-ileyh Ahmed Efendi yedinde tamamen ahz u kabz eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ba‘dehû ma‘an ba‘s olunan İsmail b. Mehmed ve Yakub b. Abdullah ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 19 Muharrem sene [1]144. Şuhûdü’l-hâl: Fahrü’l-kuzât Kabasakalzâde Ahmed Efendi, Tercüman Yunus İmâmı Ahmed Efendi b. Abdullah Efendi, Şeyh el-Hâc Mehmed Efendi b. el-Hâc Ali, İsmail b. Mehmed, İbrahim Çelebi b. Hasan, Mehmed Çelebi b. Yusuf, Ahmed Çelebi b. Hüseyin, Abdullah Efendi b. Mehmed Efendi.