Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 368 Hüküm no: 449 Orijinal metin no: [92a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balabanağa mahallesinden Meryem ile Ali Çelebi’nin muhâlaa yoluyla boşandıkları Muhâla‘a-i Nasrâniye. Mahmiye-i İstanbul’da Balaban Ağa mahallesinde sâkine olup zâtı Hasan Beşe b. İbrahim ve Mehmed Beşe b. Ahmed nâm kimesneler ta‘rîfleriyle mu‘arrefe olan Meryem bt. Karabet nâm Nasrâniye meclis-i şer‘-i hatîr-i lâzımü’t-tevkīrde zevc-i dâhili bâ‘isü hâze’l-kitâb Ali Çelebi b. Hasan nâm kimesne mahzarında ikrâr ve takrîr-i kelâm edip mezbûr Ali Çelebi zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdün-aleyh olan dört bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me‘ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iye ile muhâla‘a eylediğimde ol dahi ber-vech-i muharrer hul‘-ı mezbûru kabûl eylediğinden sonra hukūk-ı zevciyete müte‘allika âmme-i de‘âvî ve kâffe-i mutâlebâtdan her birimiz âharın zimmetini ibrâ-i âmm-ı kātı‘u’n-nizâ‘ ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 min-Muharremi’l-harâm sene [1]144. Şuhûdü’l-hâl: Kapıkethudâsı Ali Beşe b. Mustafa, Hüseyin Beşe b. Ahmed, Tahtacı Mehmed Çelebi b. Abdullah, Sarı Mehmed b. Abdullah, Kādızâde İbrahim Çelebi.