Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 369 Hüküm no: 450 Orijinal metin no: [92a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia bt. Ahmed’le evlenen İsmail Çelebi’nin nikâh akdinin geçersiz olduğu Ahz u kabz. Mahmiye-i İstanbul’da Hoca Üveys mahallesinde sâkine Râbia bt. Ahmed b. Abdullah nâm hatun tarafından husûs-ı âti’l-beyâna vekîl olduğu lede’ş-şer‘i’l-enver sâbit olan üveği babası Mustafa Beşe b. Hüseyin nâm kimesne meclis-i şer‘-i şerîf-i enverde müvekkile-i mezbûrenin zevc-i gayr-ı dâhili bâ‘isü’l-kitâb İsmail Çelebi b. Süleyman nâm kimesne mahzarında ikrâr ve takrîr-i kelâm edip mezbûr İsmail Çelebi bundan akdem alıp ve alacağım boş olsun deyü şart ve ta‘lîk etmiş iken tegāfülen müvekkile-i mezbûreyi tezevvüc ettikde şart-ı mezkûruna binâen müvekkile-i mezbûre kendinden mutallaka olmağın zimmetinde mütekarrir ve ma‘kūdün-aleyh mehr-i mu‘accel ve müecceli altı bin sekiz yüz akçeden kable’d-duhûl şer‘an lâzım gelen üç bin dört yüz akçenin iki bin dört yüz akçesini mukaddemâ ahz u kabz edip bin akçesi bâkī kalmağla meblağ-ı bâkī-i mezbûru merkūm İsmail Çelebi’den taleb ve da‘vâ eylediğinde ba‘de’n-nizâ‘ altı yüz akçesini dahi def‘ ve teslîm ol dahi ahz u kabz eylediğinden sonra mâ‘adâsına müte‘allika âmme-i da‘vâdan mezbûr İsmail Çelebi’nin zimmetini ibrâ ve ıskāt eylediğinde ol dahi kezâlik müvekkile-i mezbûrenin zimmetini ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 19 min-Muharremi’l-harâm sene [1]144. Şuhûdü’l-hâl: Hasan Çelebi b. Hüseyin tâbi‘-i Kehhâlbaşı, el-Hâc Mustafa b. el-Hâc Ahmed, İbrahim Çelebi b. Ahmed, Mehmed Çelebi b. Abdullah tahtacı, Abdullah Çelebi el-muhzır.