Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 377 Hüküm no: 461 Orijinal metin no: [94b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Unkapanı un satıcılarından fırıncıların un almasına izin verilmesi Sah. İstanbul kādısı fazîletlü efendi arzuhâlleri mûcebince mîrî dakīkden mâ‘adâ Unkapanı satıcılarından kapanda dakīk iştirâ olunmasına mümâna‘at etmeyesiz deyü buyruldu. Devletlü sa‘âdetlü sultânım hazretleri sağ olsun. Bu kulları İstanbul ve etrâf tâbi‘ kazâların habbâz fukarâlarından olup kadîmden mu‘tâdlarımız bu asırlarda havalar sıcak olmağla değirmenlerimizde tabh eylediklerimiz dakîklerimiz nânlarımıza vefâ etmediğinden etrâf yalı fırınlarda ibâdullâha nân ganîm olup usret görülmemek için Unkapanı’ndan vakıf ta‘yînâtcılardan gayrı bazı ta‘yînsiz satıcılar un iştirâ olunup kârlarımız için değil ancak ibâdullâha usret göstermeyip arzlarımız tekmîl için olup iyâzen billâhi te‘âlâ iskelelerimizde ganîm ekmek bulundukda bir vechile efendilerimize cevâba kādir hâllerimiz olmaz havfıyla arzlarımıza cesâret olunmuşdur. Âlemlere mebzûl olan merâhim-i âlîlerinden mercûdur ki mâ-tekaddemden mu‘tâd-ı kadîmimiz üzere Unkapanı satıcılarından kifâyet mikdârı usret görülmemek için dakīk iştirâ olunması bâbında fermân-ı şerîfleri recâ olunur. Bâkī fermân sultânımındır. Bendegân-ı habbâzan fukarâları. Sûret-i tezkire-i Dîvân-ı hümâyûn’dur. Mehmed Efendi İstanbul ekmekçilerinin zahîreleri kıllet üzere olduğuna binâen kapan-ı dakīkde mevcûd olan mîrî dakīkden kendilere imdâd olunmak için istirhâm etmeleriyle el-yevm kapanda mevcûd mîrî dakīkden yirmi güne dek yevmî beşer yüz keyl dakīk verilip ma‘rifetiniz ile râyic olunan bahâlarıyla şehir ekmekçilerine tevzî‘ olunup bahâları tarafınızdan mîrî için tahsîl olunmak üzere fermân-ı âlî sâdır olmağla mûcebince yevmiye ol mikdâr dakīk verilmek için İhtisâb emînine hitâben dîvân tezkiresi verilmekle külle yevm râyic olan es‘ârı mûcebince îcâb eden bahâları tarafınızdan mîrî için tahsîl olunmak şartıyla bu günki günden yirmi güne dek emîn-i mûmâ-ileyhden yevmiye beşer yüz keyl dakīk ahz ve fazîletlü İstanbul kādısı efendi hazretleri ma‘rîfetiyle şehir ekmekçilerine tevzî‘ ve taksîm edesiz. Fî 5 M sene 1144.