Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 376 Hüküm no: 460 Orijinal metin no: [94a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Odabaşı’nın evladiyet ve meşrûtiyet üzere tasarrufunda olan arazide Mehmed Bey’in hak iddiasının asılsız olduğu Kilâr-ı hâssadan Mehmed Bey b. İbrahim nâm kimesne meclis-i şer‘-i şerîf-i enverde zikri âtî arâziyi evlâdiyet ve meşrûtiyyet üzere mutasarrıfı olan bâ‘isü’l-kitâb Halil Odabaşı b. Ramazan mahzarında takrîr-i kelâm ve bast-ı merâm edip vilâyet-i Anadolu’da Bolu Sancağı’nda Yedidivan kazâsına tâbi‘ Çakallı divanı demekle ma‘rûf mahâlde vâki‘ el-Hâc İmâm Yusuf ve Yunus vakfı olan üç müdlük arâzi bâ-berât-ı âlîşân evlâdiyet ve meşrûtiyyet üzere mezbûr Halil Odabaşı’nın tasarrufunda iken arâzi-yi mezkûreye ben dahi ber-vech-i muharrer evlâdiyet ve meşrûtiyyet üzere mutasarrıfım deyü mezbûr Oda[başı] üzerine da‘vâya tesâddî eylemişdim. Hâlâ da‘vâ-yı mezkûremin kat‘a aslı olmamağın da‘vâ-yı mezkûremden fâriğ ve senedâtımı kendiye teslîm ol dahi yedimden ba‘de’l-kabz husûs-ı mezkûra müte‘allika âmme-i da‘vâdan mezbûr Halil Odabaşı’yı ibrâ-i âm ile ibrâ ve ıskāt eylediğimde ol dahi târih-i kitâba gelince arâzi-i mezkûre mahsûlâtına müte‘allika âmme-i da‘vâdan benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 Muharrem sene [1]144. Şuhûdü’l-hâl: Halil Efendi b. Mahmud, es-Seyyid Halil Efendi b. Abdullah, el-Hâc Halil Efendi b. Abdullah, es-Seyyid el-Hâc Hüseyin, Molla Mustafa b. Mehmed, Mustafa Reis b. Ahmed, Bâzârcı Mehmed Beşe b. Halil, Kilârî Mustafa Reis b. Ahmed, Ahmed Çavuş el-mübâşir.