Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 71 Hüküm no: 1 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamide Hatun’un eşi İbrahim ile muhâlaa yoluyla boşandığı Sâbıkā imâm-ı hazret-i şehriyârî olan merhûm Mahmud Efendi’nin necl-i necîbleri fazîletlü mekremetlü inâyetlü Abdullah Efendi hazretlerinin ikinci sicill-i mahfûzlarıdır. Harrerehü’l-fakīr Feyzullah el-mukayyidü mahkemeti Bâb bi-medîneti Kostantıniyye el-mahmiye Rabbi yessir ve lâ-tu‘assir Rabbi temmim bi’l-hayr ve bihî nesta‘în Muhâla‘a Mahmiye-i İstanbul’da Çatladıkapı kurbünde Perviz Ağa mahallesinde sâkine olup zâtı Yusuf Çelebi b. Mehmed ve es-Seyyid Mustafa b. Mehmed ta‘rîfleriyle mu‘arrefe olan Hamide bt. Şah Mehmed nâm hatun meclis-i şer‘-i hatîr-ı lâzımü’t-tevkīrde zevc-i dâhili bâ‘is-i hâze’l-kitâb el-Hâc İbrahim b. Ahmed nâm kimesne mahzarında ikrâr ve takrîr-i kelâm edip mezbûr el-Hâc İbrahim zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh üç bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim merkūm el-Hâc İbrahim ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyete vesâir târîh-i kitâba gelince âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-Zilka‘de sene 1152. Şuhûdü’l-hâl: es-Seyyid Mustafa Ruhalı, Yusuf Ağa b. Mehmed, es-Seyyid Mustafa b. Mehmed, Üsküdarî Ali b. Abdullah