Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 72 Hüküm no: 2 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Marat’ın bağ ve bahçesini Apostol’a sattığı Ba‘de’l-fek mübâya‘a Vilâyet-i Anadolu’da Eğin kazâsına tâbi‘ Çorak nâm karye ahâlîsinden olup mahmiye-i İstanbul’da Tahtelkale kurbünde sarrâf dükkânında mütemekkin Sarrâf Marat v. İmircan nâm zimmî meclis-i şer‘-i enverde yine karye-i mezbûreden bâ‘isü’s-sifr Apostol v. Nazar nâm zimmî muvâcehesinde ikrâr ve takrîr-i kelâm edip akd-i âtî sudûruna değin yedimde mülküm olup karye-i mezbûre toprağında vâki‘ bir tarafdan Apostol zimmî bağı ve bir tarafdan çayır ve bir tarafdan kayalık ve bir tarafdan tarîk-i âm ile mahdûd kürûmî mülk bağım ile yine bir tarafdan Misail nâm zimmî bahçesi ve bir tarafdan çayır ve bir tarafdan kayalık ve bir tarafdan tarîk-ı âm ile mahdûd mülk bahçemi târîh-i kitâbdan on beş sene mukaddem üç yüz guruş semen-i makbûza bi-tarîkı’l-istiğlâl mezbûr Apostol zimmîye mahallinde bey‘ ve teslîm ol dahi ber-vech-i muharrer iştirâ ve tesellüm etmiş idi. Lâkin târîh-i mezbûrdan ilâ-hâze’l-ân benim için fekk-i rehn [ve] edâ-i deyn müyesser olmamağla hâlâ hudûdları zikr olunan bağ ve bahçemi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile yine mezbûr Apostol’a bi-safkain vâhidetin üç yüz elli guruşa bey‘ ve temlîk ve yine her biri mahallinde kabz ve tesellüme taslît eylediğimde ol dahi ber-minvâl-i muharrer iştirâ ve temellük ve kabûl eylediğinden sonra semenleri olan meblağ-ı mezbûr üç yüz elli guruşun üç yüz guruşu zimmetimde olan üç yüz guruşa takas eylediğinde ben dahi ba‘de’l-mukāssa ve’l-kabûl mezbûr Apostol bâkī elli guruşu dahi bana def‘ ü teslîm eyledikde yedinden ahz u kabz edip meblağ-ı mezbûr üç yüz elli guruşu ol vechile tamâmen ahz u kabz eyledim ba‘de’l-yevm hudûdları zikr olunan bağ ve bahçede benim kat‘an alâka ve medhalim kalmayıp mezbûr Apostol’un mülk-i müşterâsı olmuşdur, keyfe mâ yeşâ’ ve yehtâr mutasarrıf olsun dedikde gıbbe’t-tasdîk. Fî 10 Za sene 1152. Şuhûdü’l-hâl: Mehmed Beşe b. Ali, Ahmed b. İsmail, Mehmed b. İsmail, Mustafa Bey b. İbrahim, Hüseyin b. Halil, Misail v. Şöhret, Hazaros v. Nahek, Masis v. Karabet, Siryab v. Elmas