Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 99 Hüküm no: 39 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yolculuğa giderken hanımı Fatıma’ya nafaka ödemesi için Abdullah Efendi’yi tayin eden Kapıcı Mehmed’in vefat etmesinden dolayı ödemenin durdurulduğu İhbâr-ı mevt Mahmiye-i İstanbul’da Sancakdâr Hayreddin mahallesinde sâkine Fâtıma bt. Abdullah nâm hatun meclis-i şer‘-i şerîf-i enverde bâ‘isü’l-kitâb Abdullah Efendi b. Osman mahzarında üzerine da‘vâ ve takrîr-i kelâm edip zevc-i dâhilim Kapıcı Mehmed b. Musa b. Abdullah bir husûs için târîh-i kitâb senesi mâh-ı Receb-i şerîfi gurresinde İsmail kasabasına gider oldukda beher mâh bana birer guruş nafaka ta‘yîn eyledikde mezbûr Abdullah Efendi meblağ-ı mezbûra bi’l-emr ve’l-kabûl kefîl oldukdan sonra târîh-i kitâba gelince beş ay on yedi gün mürûr edip ve mezbûr Abdullah Efendi bir guruş verip mâ‘adâyı vermekden imtinâ‘ eder suâl olunup nafakamı bana îfâ etmek üzere mezbûr Abdullah Efendi’ye tenbîh olunmak matlûbumdur dedikde gıbbe’s-suâl mezbûr Abdullah Efendi cevâbında ber-vech-i muharrer kefâletini ikrâr edip lâkin müdde‘iye-i mezbûre Fâtıma’nın zevci merkūm Kapıcı Mehmed b. Musa târîh-i mezkûr senesi mâh-ı Şa‘bân-ı şerîfi gurresinde zikr olunan İsmail kasabasında vefât etmekle mâ‘adâ nafaka-i mezkûreden zimmetim berî olmuşdur deyü def‘le mukābele edicek gıbbe’l-istintâk ve’l-inkâr mezbûr Abdullah Efendi’den def‘-i mezkûruna beyyine taleb olundukda udûl-ı ahrâr-ı ricâl-i Müslimînden ve mahmiye-i mezbûrede Sultan Bayezid mahallesinde sâkin Bostânî el-Hâc Halil b. Mustafa ve Bostânî Mehmed b. Ahmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu müdde‘iye-i mezbûre Fâtıma’nın zevci müteveffâ Mehmed b. Musa b. Abdullah târîh-i kitâb senesi Şa‘bân-ı şerîfi gurresinde İsmail kasabasında bizim huzûrumuzda vefât eyledi ve defnine hâzır olduk deyü her biri edâ-i şehâdet-i şer‘iyye ettiklerinde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm mezbûre Fâtıma bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Zilhicce sene 1152. Şuhûdü’l-hâl: Mehmed Efendi b. Derviş Mehmed el-imâm, Mehmed Çelebi b. Ahmed, Ahmed Çelebi b. Abdullah