Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 98 Hüküm no: 38 Orijinal metin no: [6b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa ve Hayim’in Serkiz ve Hampasun’a olan borçlarının kefili olan Artiyon’un borcu ödemesi Hükm-i kefâlet Sarrâf tâifesinden bâ‘isü’r-rakīm Serkiz v. Sahak ve şerîki Hampasun [v.] Varaz nâm Ermeniler meclis-i hatîr-ı lâzımü’t-tevkīrde Mismârî Artiyon v. Norses nâm Ermeni muvâcehesinde üzerine da‘vâ ve takrîr-i kelâm edip gāib ani’l-meclis Hasan Ağa b. Abdullah b. Abdurrahman ve Hayim v. Hayim v. (°) nâm Yahûdi zimmetlerinde ber-mantûk-ı temessük cihet-i karzdan iki bin altı yüz on guruş hakkımıza mersûm Artiyon bi’l-emr ve’l-kabûl kefâlet-i sahîha-i şer‘iyye ile kefîl oldukdan sonra meblağ-ı mezbûrun bin beş yüz guruşunu mezbûr Hasan Ağa ve merkūm Hayim yedlerinden ahz u kabz edip bin yüz on guruş zimmetlerinde bâkī kalmağla meblağ-ı mezbûr bin yüz on guruşu bizlere edâya mersûm Artiyon’a tenbîh olunmak murâdımız dediklerinde gıbbe’l-istintâk mersûm Artiyon ber-vech-i muharrer kefâleteyni ikrâr ve i‘tirâf etmeğin mûcebince meblağ-ı bâkī-yi mezbûr bin yüz on guruşu müdde‘iyân-ı merkūmâna bi-hükmi’l-kefâle edâya mersûm Artiyon’a tenbîh birle mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe li-sene isneteyn ve hamsîn ve mi’e ve elf. Şuhûdü’l-hâl: Mehmed Çelebi b. Abdullah, Salih Çelebi b. Süleyman, İsmail Çavuş Ağa el-mübâşir, Hüseyin Çelebi b. el-Hâc Mehmed, Abdullah Çelebi b. Mehmed, Mehmed Çelebi b. Eyüb