Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 100 Hüküm no: 41 Orijinal metin no: [7a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akbaş ve Yaycı Ali adlı has karyeleri ahalisi arasındaki imdadiye vergisi hususunda ortaya çıkan anlaşmazlığa son verildiği İbrâ Vilâyet-i Rumeli’de Çirmen kazâsı kurâsından zübdetü’l-muhadderât tâcü’l-mestûrât iffetlü ismetlü Hadîce Sultan hazretlerine hâs ta‘yîn buyrulan karyelerden mâ‘adâ kurâ-i ma‘lûmeden Akbaş nâm karye ahâlîsinden Mustafa b. Hüseyin nâm kimesne meclis-i şer‘-i şerîf-i enverde hâss-ı mezbûr karyelerinden Yaycı Ali nâm karye ahâlîsinden bâ‘is-i hâzihi’l-vesîka Hüseyin b. Ali nâm kimesne mahzarında ikrâr-ı tâm ve takrîr-i kelâm edip mezbûr Hüseyin kendi tarafından asîl ve hâs olan mârrü’z-zikr karye ahâlîsi ma‘lûmü’l-esâmî ve mahsûrü’l-eşhâs kimesneler taraflarından husûs-ı âti’l-beyânda vekîl olup ben dahi kezâlik husûs-ı âti’l-beyânda asîl ve mâ‘adâ kurâ ahâlîsi olan ma‘lûmü’l-esâmî ve mahsûrü’l-eşhâs kimesneler taraflarından vekîl olup işbu târîh-i vesîka senesi kazâ-i mezbûrun menzil-i imdâdiyesi için hâss-ı mezkûr kurâsı ahâlîsine isâbet eden yedi yüz guruşu asâleten ve vekâleten taleb eylediğimde onlar dahi bizim karyelerimiz hâs olduğu ecilden tekâlîfden mu‘âf iken bundan akdem husûs-ı mezbûr için bi-gayr-ı vechin mâlımızdan ahz eylediğiniz sekiz yüz guruşu istirdâd ederiz deyü bizden taleb eylediklerinde ba‘de vukū‘i’l-münâza‘ati’l-kesîre her birimiz asâleten ve vekâleten husûs-ı mezbûrdan ferâgat ve kat‘-ı münâza‘a edip husûs-ı mezbûra müte‘allıka âmme-i da‘vâdan beni vekîl-i mezbûr Hüseyin’in müvekkillerinin zimmetlerini ibrâ ve ıskāt eylediğimde merkūm Hüseyin dahi kezâlik âmme-i da‘vâdan ve ber-vech-i muharrer benim ve müvekkillerimin zimmetlerini asâleten ve vekâleten ibrâ ve ıskāt edip aslâ ehad-i tarafeynin âhar ile husûs-ı mezbûra müte‘allıka nizâ‘ları kalmadı dedikde mezbûr Hüseyin dahi tasdîk etmeğin hıfzan li’l-makāl mâ-vaka‘a bi’t-taleb ketb olundu. Fi’l-yevmi’l-ışrîn min-Zilhicce sene 1152. Şuhûdü’l-hâl: Salih Efendi b. (°), Tatar Hasan Ağa b. (°), Abdullah Beşe Kündekli, es-Seyyid Ahmed b. es-Seyyid Halil, es-Seyyid Mehmed b. es-Seyyid İbrahim, Osman b. Murad, el-Hâc Mustafa Edirneli