Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 101 Hüküm no: 42 Orijinal metin no: [7a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer sırasında orduya ekmek pişiren ekmekçilerin sefer dönüşü ücretlerini miri ekmekçibaşı elinden aldıkları Ahz u kabz Mîrî ekmekçilerinden es-Seyyid Ali Çelebi b. es-Seyyid Hacı Mehmed ve Ömer Beşe b. Ahmed ve İsmail Beşe b. Hüseyin ve Halil Bey b. Hacı İsmail nâm kimesneler ile yine mîrî ekmekçi ustalarından Serkiz v. Kogas ve Nogaz v. Kirekor ve Ananiye v. Kirekor ve Margos v. Mercan ve Kasber v. Haçador ve Artin v. Nursez ve Asvador v. Sementin ve Moses v. Tokas ve Nazari v. Bağdasar ve Avanes v. Serkiz ve Şahin v. Piço ve Yako v. Yovan ve Avanes v. Arakil ve Abraham v. Agob ve Manos v. Avakim ve Nadolko v. Piço ve Tatos v. Arakir nâm zimmîler meclis-i şer‘-i hatîr-ı lâzımü’t-tevkīrde mîrî ekmekçibaşısı bâ‘is-i hâze’s-sifr Sementin v. Bağdasar nâm zimmî muvâcehesinde her biri ikrâr-ı tâm ve takrîr-i kelâm edip bizler işbu bin yüz elli iki senesinde vâki‘ sefer-i hümâyûnda Ordu-yı hümâyûn ekmekçisi olup avdet-i seferde Niş’den Silivri’ye gelince müstahık olduğumuz ücret-i tabhiyemizden bin yüz guruş bâkī kalmış idi, hâlâ meblağ-ı bâkī-yi mezbûr bin yüz guruşu nüzûl emîni ağa yediyle mesfûr Sementin zimmîye teslîm olundukda ol dahi meblağ-ı mezbûr bin yüz guruşu tamâmen bize def‘ ü teslîm biz dahi ber-vech-i muharrer meblağ-ı bâkī-yi mezbûr bin yüz guruşu mesfûr Sementin zimmî yedinden bi’t-tamâm ve’l-kemâl ahz u kabz edip bi-kadri’l-hısâs beynimizde tevzî‘ ve taksîm eyledik min-ba‘d ücret-i tabhiyemizden mezbûr Sementin yedinde ve zimmetinde bir akçe ve bir habbe hakkımız bâkī [7b] kalmayıp husûs-ı mezkûra müte‘allıka âmme-i da‘vâdan merkūm Sementin zimmînin zimmetini ibrâ ve ıskāt eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin aşer min-Zilhicce sene 1152. Şuhûdü’l-hâl: Kandil Süleyman Ağa b. Abdullah, es-Seyyid Mustafa b. Hasan, Solak Mustafa, Molla Hüseyin du‘âcı