Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 106 Hüküm no: 50 Orijinal metin no: [8a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mustafa’dan oğullarına kalan vakıf ev ve dükkânlardaki hisselerin Ahmed b. Abdullah’a satıldığı Îcâr-ı vakıf menzil Medîne-i hazret-i Ebî Eyyûb el-Ensârî -radiye anhü Rabbühü’l-bârî- mahallâtından Kiremitçi Süleyman Çelebi mahallesinde sâkin iken bundan akdem vefât eden Pişmişzâde demekle şehîr el-Hâc Mehmed b. Mustafa b. Abdullah’ın sulbî sagīr oğlu Ahmed ve Mustafa’nın vâlideleri ve vasiye-i muhtâreleri olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Saliha bt. Abdullah nâm hatun meclis-i şer‘-i şerîf-i enverde hâlâ zevci bâ‘is-i hâzihi’l-vesîka Ahmed b. Abdullah nâm kimesne mahzarında bi’l-vekâle ikrâr-ı tâm ve takrîr-i kelâm edip merhûm Kadı Sadi Efendi Vakfı’ndan olup mahmiye-i İstanbul hısnı ebvâbından Balatkapısı dâhilinde Hamamcı Muhyiddin mahallesinde vâki‘ ma‘lûmü’l-hudûd bir birine muttasıl ma‘lûmü’l-müştemilât üç bâb menâzilin ikisi ve tahtlarında bir bakkāl ve bir çilingir dükkânlarının mecmû‘u sekiz sehm i‘tibâriyle dört sehmi Bıçakcızâde es-Seyyid Mehmed nâm kimesnenin dört sehmi müteveffâ-yı mezbûrun hayâtında ile’l-vefât bi’l-icâreteyn taht-ı tasarruflarında ba‘de vefâtihî birer sehmi sagīrân-ı mezbûrân Ahmed ve Mustafa ile âhar zevce-i mutallakası Hadîce nâm hatundan mütevellidler olan oğlu Ömer ve kızı Hafife nâm sagīr ve sagīreye ve ittisâlinde vâki‘ yine vakf-ı mezbûrdan bi’l-icâreteyn müteveffâ-yı mezbûrun ile’l-vefât taht-ı tasarrufunda ba‘de vefâtihî evlâd-ı mezkûresine ale’l-iştirâki’s-seviyy intikāl etmiş idi, el-hâletü hâzihi zikr olunan menâzil ve dükkânlar vakıf olduğundan mâ‘adâ harâb olup hâsılı harcına vefâ etmemekle vasiyesi olduğum oğullarım mezbûrân Ahmed ve Mustafa’nın mârrü’z-zikr üç bâb menâzilin cümlesinden hisse-i ma‘lûmelerini nef‘an lehümâ kıbel-i şer‘den me’zûnen bâ-ma‘rifet-i mütevellî bedel-i misli olan üç yüz guruş mukābelesinde bi’l-vesâye zevcim mezbûr Ahmed’e ferâğ ve tefvîz ve teslîm eylediğimde ol dahi ber-vech-i muharrer tefevvüz ve tesellüm ve kabûl ve bedel-i mezkûru bana teslîm eylediğinde ben dahi bi’l-vesâye yedinden tamâmen tesellüm ve ahz u kabz eyledim dedikde mezbûr Ahmed dahi mukırra-i mezkûreyi vicâhen ve şifâhen tasdîk ve tahkīk etmeğin mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Zilhicceti’ş-şerîfe li-sene isneyn ve hamsîn ve mi’e ve elf min-hicreti men-lehü’l-izzü ve’ş-şeref. Şuhûdü’l-hâl: Uzun el-Hâc Mehmed b. Eyûbî?, Attâr Küçük Mustafa, el-Hâc İbrahim b. Abdurrahman, Mehmed Çelebi b. Abdullah, Solak Mustafa muhzır