Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 106 Hüküm no: 49 Orijinal metin no: [8a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun’un eşi Mehmed’den muhâlaa yoluyla boşandığı Muhâla‘a Mahmiye-i İstanbul’da Kabakulak mahallesinde sâkine ve zâtı ta‘rîf-i şer‘î ile mu‘arrefe olan Zeyneb bt. Abdullah nâm hatun meclis-i şer‘-i hatîr-ı lâzımü’t-tevkīrde zevc-i dâhili işbu bâ‘isü’l-kitâb el-Hâc Mehmed b. İbrahim mahzarında ikrâr-ı tâm ve takrîr-i kelâm edip mezbûr el-Hâc Mehmed zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh sekiz guruş mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr el-Hâc Mehmed ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyete ve târîh-i kitâba gelince beynimizde cereyân eden sâir hukūk-ı ma‘lûme ve mechûleye müte‘allıka âmme-i de‘âvî ve kâffe-i mutâlebâtdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Zilhicceti’ş-şerîfe sene 1152. Şuhûdü’l-hâl: Hasan Çelebi b. Hüseyin, Ahmed Çelebi b. Şa‘bân, es-Seyyid Mustafa Ruhalı, el-Hâc Mustafa b. Mehmed, Molla Hüseyin du‘âcı, Emir Ali muhzır, İbrahim b. Ahmed, Mustafa b. Mehmed