Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 108 Hüküm no: 52 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet’in Kudüs’teki evini Mar Yakob Manastırı Vakfı’na sattığı Mübâya‘a-i menzil Mahmiye-i İstanbul’da Fenerkapısı dâhilinde Tevkī‘î Cafer Çelebi mahallesinde mütemekkin Karabet v. Honas nâm zimmî meclis-i şer‘-i hatîr-ı lâzımü’t-tevkīrde Kudüs-i şerîfde vâki‘ Mar Yakob Manastırı’nın nukūd-ı mevkūfesine bi’l-fi‘il mütevellîsi olan bâ‘is-i hâze’s-sifr Yakob Rahib v. Bogos nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Çilingir İsayi zimmî menzili ve bir tarafdan Eflak sarayı ve bir tarafdan Sarrâf Avanes menzili ve bir tarafdan tarîk-i âm ile mahdûd fevkānî dört bâb oda ve bir kebîr sofa ve bir dehliz ve bir kenîf ve bir bodrum ve bir kârgîr mahzen ve bir bi’r-i mâ ve bir bahçe ve bahçe içinde bir camlı köşkünü müştemil mülk menzilimi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mütevellî-yi merkūma üç yüz guruşa bey‘ ve teslîm eylediğimde ol dahi mâl-ı vakf-ı mezbûr ile vakıf için iştirâ ve tesellüm ve kabz ve kabûl eylediğinden sonra semeni olan meblağ-ı mezbûrun yalnız yüz elli guruşunu ben mütevellî-yi mezbûr yedinden ahz u kabz eyleyip menzil-i mahdûd-ı mezkûr vakf-ı mezbûrun müstagallâtından oldukdan sonra mersûm menzil-i mezkûru yüz elli guruş icâre-i mu‘accele ve yevmî bir buçuk akçe icâre-i müeccele ile bi’t-tevliye bana îcâr ve teslîm ben dahi istîcâr ve kabûl edip semen-i menzil-i mezkûr üç yüz guruşdan mütevellî-yi mezbûr zimmetinde bâkī kalan yüz elli guruşu mu‘accele-i mezkûre yüz elli guruşa takas ve mahsûb eylediğimde ol dahi mukāssa ve kabûl edip menzil-i mezkûrun semenine ve tağrîr [ve] gabnine ve mu‘accele-i mezkûrenin istîfâsına müte‘allıka âmme-i de‘âvî ve kâffe-i mutâlebâtdan cânib-i vakf ve mütevellî-yi mezbûru ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 min-Zilhicce sene 1152. Şuhûdü’l-hâl: İmâm Mehmed Efendi b. Osman, Ömer Halîfe b. Mehmed müezzin, Nurullah Çelebi b. Ali, İbrahim Çelebi b. Ebubekir, Ali Beşe b. Osman, Hüseyin Beşe b. Abdullah, Yusuf b. Abdullah, Papa Artin v. Haçador, Sekbas v. Vartan, Papa Abraham v. Nikifos, Agob v. Asvador