Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 109 Hüküm no: 53 Orijinal metin no: [8b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Mehmed ile onu yaralayan Ahmed ve Hasan arasındaki davaya sulh bedeli karşılığı son verildiği Sulh Havâss-ı refî‘a nevâhîsinden Terkos nâhiyesinde sâkin es-Seyyid Hasan b. Mehmed b. Oruc’un li-ebeveyn er karındaşı ve tarafından zikri âtî sulhü ikrâra vekîl olduğu nâhiye-i mezbûre imâmı Ali Efendi b. Veliyüddin Abdullah el-Hâc Ahmed nâm kimesneler şehâdetleriyle ber-nehc-i şer‘î sâbit olan es-Seyyid Bilal nâm kimesne meclis-i şer‘-i hatîr-ı lâzımü’t-tevkīrde işbu bâ‘iseyü’l-vesîka Ahmed b. Mehmed ve Hasan b. el-Hâc Hüseyin nâm kimesneler muvâcehelerinde bi’l-vekâle ikrâr-ı tâm ve takrîr-i kelâm edip mezbûrân Ahmed ve Hasan bundan akdem müvekkilim mezbûr es-Seyyid Hasan’ın sol kolunun dirseğinden ve sol memesinin altından beyâz kabzalı bıçak ile bi-gayr-ı hakkın amden darb ve cerh etmeleriyle mûceb-i şer‘îsini mezbûrândan taleb ve da‘vâ ettikde onlar dahi bi’l-külliye münkir olmalarıyla beynlerinde nizâ‘-ı küllî cereyân etmiş idi, el-hâletü hâzihi tavassut-ı muslihîn ile da‘vâ-yı mezkûresinden mezbûrân Ahmed ve Hasan ile an-inkâr otuz beş guruş bedel mukābelesinde sulh olup bedel-i sulh merkūm otuz beş guruşu mezbûrânın yedlerinden tamâmen ahz u kabz eylediğinden cerh-i mezkûra ve mâ-yahdüsü anhe müte‘allıka âmme-i da‘vâdan mezbûrân Ahmed ve Hasan’ın zimmetlerini ibrâ-i âmm-ı katı‘u’n-nizâ‘la ibrâ ve ıskāt ettikde onlar dahi ba‘de’l-kabûl bedel-i sulh-ı merkūm otuz beş guruşa müte‘allıka âmme-i da‘vâdan müvekkilim mezbûr es-Seyyid Hasan’ın zimmetini ibrâ-i âmm-ı katı‘u’n-nizâ‘la ibrâ ve ıskāt eylediler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Zilhicceti’ş-şerîfe li-sene isneteyn ve hamsîn ve mi’e ve elf. Şuhûdü’l-hâl: İmâm Ali Efendi b. Veliyüddin, Abdullah b. el-Hâc Ahmed, Mehmed Çelebi b. Abdullah, Mumcu Musa Beşe el-mübâşir