Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 310 Hüküm no: 446 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mosi v. İsak’ın ibrişim bahasından borcu olduğu İşbu bâ‘isü’l-kitâb Mehmed Beşe b. el-Hâc Ahmed nâm kimesne meclis-i şer‘-i hatîr-i lâzımü’t-tevkīrde mahmiye-i İstanbul’da Küçükpazar cemâ‘atinden Mosi v. İsak nâm Yahûdi muvâcehesinde üzerine da‘vâ ve takrîr-i kelâm edip mezbûr Mosi zimmetinde yedimden müşterâ ve makbûz mikdârı beynimizde ilm-i şer‘î ile ma‘lûm ibrişim bahâsından bin üç yüz yetmiş akçe hakkım vardır, suâl olunup alıverilmesi matlûbumdur dedikde gıbbe’s-suâl mezbûr Mosi cevâbında fi’l-vâki‘ müdde‘î-i merkūm Mehmed Beşe’ye vech-i muharrer üzere zimmetimde lâzımü’l-edâ ve vâcibü’l-kazâ bin üç yüz yetmiş akçe deynim vardır deyü ikrâr u i‘tirâf etmeğin ikrârı mûcebince meblağ-ı mezbûr bin üç yüz yetmiş akçeyi müdde‘î-i mersûm Mehmed Beşe’ye def‘ ve teslîm etmek üzere mezbûr Mosi’ye tenbîh olunup mâ-hüve’l-vâki‘ bi’t-taleb ketb olundu. Fi’l-yevmi’l-hâdî aşer min-Şevvâli’l-mükerrem li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Rıdvan Bey b. Abdullah, Mehmed b. Abdullah ve gayruhum mine’l-huzzâr.