Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 311 Hüküm no: 447 Orijinal metin no: [66a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pir Mehmed’in borcuna kefil olan İbrahim’in parayı alacaklı olan el-Hâc Mustafa’ya ödemesi İşbu sâhibü’l-kitâb el-Hâc Mustafa b. Hasan nâm kimesne mahfil-i şer‘-i şerîfde helvacı tâifesinden İbrahim b. Mehmed muvâcehesinde üzerine da‘vâ edip yine helvacı tâifesinden mezbûr Pir Mehmed’in üstâdı olup gāib ani’l-meclis olan Pir Mehmed nâm kimesne zimmetinde siyah üzüm bahâsından dokuz bin yüz akçe hakkım olup meblağ-ı mezbûrdan bi’d-defa‘ât dört bin iki yüz on akçesin ahz ve istîfâ edip bâkī dört bin sekiz yüz altmış akçesine mezbûr Mehmed’in emriyle merkūm İbrahim kefîl bi’l-mâl olmuşdur, hâlâ kefâleti hasebiyle meblağ-ı mezbûru taleb ederim dedikde gıbbe’s-suâl mezbûr İbrahim, hâl zikrolunan minvâl üzere olduğunu mukırr ve mu‘terif olmağın i‘tirâfı mûcebince edâsına tenbîh-birle mâ-vaka‘a bi’t-taleb ketb olundu. Fî-evâsıtı Şevvâli’l-mükerrem li-sene erba‘a ve sittin ve elf. Şuhûdü’l-hâl: Mehmed Beşe çukadâr, Pîrî Bey b. Hüseyin, Mehmed Çelebi b. Hüseyin, İbrahim Çelebi b. Davud ve gayruhum.