Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 155 Hüküm no: 117 Orijinal metin no: [16b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe ile kendisini yaralayan Osman Beşe arasındaki davaya sulh bedeli karşılığı son verildiği Sulh Mahmiye-i İstanbul’da Topkapısı dâhilinde Kürkçübaşı mahallesinde sâkin Hasan Beşe b. Ömer nâm kimesne meclis-i şer‘-i hatîr-ı lâzımü’t-tevkīrde bâ‘is-i hâze’l-kitâb Osman Beşe b. Süleyman nâm kimesne mahzarında ikrâr-ı tâm ve takrîr-i kelâm edip mezbûr Osman Beşe târîh-i kitâbdan dört gün mukaddem Mimâr Çarşısı’nda gazzâz dükkânı önünde sol pazumdan ve sol dizimin üzerinden siyâh kabzalı bıçak ile bi-gayr-ı hakkın amden darb ve cerh etmekle mûceb-i şer‘îsini taleb ederim deyü da‘vâya tasaddî edip beynimizde münâza‘ât-ı kesîre cereyân etmiş idi, el-hâletü hâzihi beynimizde muslihûn tavassut edip da‘vâ-yı mezkûremden beni mezbûr Osman Beşe ile an-inkâr kırk guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezbûr kırk guruşu mezbûr Osman Beşe yedinden tamâmen ahz u kabz edip cerh-i mezkûra ve mâ-yahdüsü anhe müte‘allıka âmme-i da‘vâdan mezbûr Osman Beşe’nin zimmetini ibrâ ve ıskāt eylediğimde ol dahi kezâlik bedel-i sulh-ı mezkûra müte‘allıka âmme-i da‘vâdan benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Muharremi’l-harâm sene 1153. Şuhûdü’l-hâl: Ebubekir Beşe b. Hüseyin, Salih b. Ali, Osman b. Ahmed, Mehmed Beşe b. Osman, Musa Beşe b. Hüseyin, Abbas b. Hüseyin