Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 157 Hüküm no: 119 Orijinal metin no: [16b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Sunullah Efendi’nin hanımı Râbia’nın terekeden olan arsayı daha önce borcuna karşılık aldığından varislerin arsada hakkı olmadığı Bi-imzâ-i efendi Mahmiye-i İstanbul’da Ali Paşa-i atîk mahallesinde sâkin iken bundan akdem vedâ‘-ı âlem-i fânî eden Sunullah Efendi b. Abdullah b. Abdullah’ın verâseti zevce-i metrûkesi Râbia bt. Abdullah b. Abdullah nâm hatun ile usûbet-i nesebiye cihetinden li-ebeveyn ammi oğulları olup ba‘dehû intikāl-i dâr-ı bekā eden merhûm Abdülbaki Efendi b. el-merhûm Kevâkibîzâde Veliyüddin Efendi ile fahrü’l-müderrisîni’l-kirâm Şeyh Mehmed Efendi ve umdetü’l-müderrisîni’l-kirâm Abdullah Efendi ibney el-merhûm el-mebrûr Kevâkibîzâde Mustafa Efendi’ye ve İbrahim Molla Efendi b. el-merhûm Kevâkibîzâde Ahmed Efendi’ye ba‘de’l-ihzâr mûmâ-ileyh Abdullah Efendi meclis-i şer‘-i şerîfde bâ‘isetü hâzihi’l-vesîka mezbûre Râbia tarafından husûs-ı âti’l-beyânda husûmet ve redd-i cevâba vekîl olduğu zât-ı mezbûreyi ma‘rifet-i şer‘iyye ile ârifân Ali Efendi b. Şa‘bân ve Abbas b. Abdullah nâm kimesneler şehâdetleriyle şer‘an sâbit ve mütehakkık ve sübût-ı vekâletine hükm-i şer‘î lâhık olan es-Seyyid el-Hâc Ömer b. es-Seyyid Hasan nâm kimesne mahzarında üzerine da‘vâ ve takrîr-i kelâm edip mahalle-i mezbûrede vâki‘ ma‘lûmü’l-hudûd mülk arsa-i ma‘lûme mûrisimiz müteveffâ-yı mezbûrun ile’l-vefât yedinde mülkü ba‘de vefâtihî bana ve verese-i sâire-i mezkûresine mevrûs olmuş iken müvekkile-i mezbûre Râbia müstakıllen kendi mülkü olmak üzere vaz‘-ı yed etmişdir, hâlâ suâl olunup arsa-i merkūmede olan hisse-i irsiye-i şer‘iyyemden müvekkile-i mezbûrenin kasr-ı yedine vekîl-i merkūma tenbîh olunmak matlûbumdur dedikde gıbbe’s-suâl vekîl-i mezbûr cevâbında husûs-ı mezbûru ikrâr lâkin müteveffâ-yı mezbûrun müvekkilem mezbûreye cihet-i karz-ı şer‘îden iki yüz guruş deyn-i müsbeti olmağla arsa-i merkūmeyi vasiyy-i muhtârı olan merkūm Abdülbaki Efendi hayâtında mesâğ-ı şer‘îye [17a] binâen bi’l-izni’ş-şer‘î semeni misli olan iki yüz guruşa bi’l-vesâye müvekkilem mezbûreye bey‘ ve teslîm ve semen-i mezbûru deyni merkūm iki yüz guruşa ber-nehc-i şer‘î takas eylediğinde mezbûre Râbia dahi ber-vech-i muharrer iştirâ ve tesellüm ve mukāssa ve kabûl edip arsa-i merkūmenin mecmû‘u müvekkilem mezbûre Râbia’nın müstakıllen mülk-i müşterâsı olmağla ba‘de’d-def‘ ve’l-inkâr vekîl-i mezbûrdan def‘-i mezkûrunu mübeyyine beyyine taleb olundukda udûl-ı ahrâr-ı ricâl-i Müslimînden olup merkūme Râbia’nın zâtını ârifân Salih Efendi b. el-Hâc İsmail ve İsmail b. Abdullah nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr Sunullah Efendi’nin müvekkile-i mezbûre Râbia’ya cihet-i karz-ı şer‘îden iki yüz guruş deyn-i müsbeti olmağla arsa-i merkūmeyi vasiyy-i muhtârı olan merkūm Abdülbaki Efendi hayâtında mesâğ-ı şer‘îye binâen bi’l-izni’ş-şer‘î semen-i misli olan iki yüz guruşa bi’l-vesâye müvekkilem mezbûre Râbia’ya bey‘ ve teslîm ve semen-i mezbûru deyn-i merkūm iki yüz guruşa ber-nehc-i şer‘î takas eylediğinde mezbûre Râbia dahi ber-vech-i muharrer iştirâ ve tesellüm ve mukāssa ve kabûl edip arsa-i mezbûrenin mecmû‘u müstakıllen mülk-i müşterâsı olmuşdur, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm müdde‘î-i mezbûr Abdullah Efendi ber-minvâl-i muharrer bi-gayr-ı vechin mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-hâmis min-Muharremi’l-harâm sene 1153. Şuhûdü’l-hâl: Salih Efendi b. Hacı İsmail, İsmail b. Abdullah, Salih Çelebi b. Abdullah, Ali Efendi b. Şa‘bân, Abbas b. Abdullah Temme’l-kelâm fî-hâze’l-makām Bi-avnillâhi’l-Meliki’l-allâm (mühür) El-emru hasbemâ hurrire fîhi nemakahû el-fakīr ileyhi te‘âlâ el-Hâc İbrahim el-müvellâ hilâfeten bi-medîneti Kostantıniyye el-mahmiye -gufira lehû-