Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 158 Hüküm no: 120 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzioğlu Artiyon’dan kalan fırın aletlerinin borcuna karşılık varislerden Kevork’a satıldığı Mübâya‘a-i âlât-ı değirmen Vilâyet-i Anadolu’da Kuruçay kazâsına tâbi‘ Amrida nâm karyede mütemekkin iken bundan akdem hâlik olan Terzioğlu Artiyon v. Toros v. Koz nâm zimmînin verâseti zevce-i metrûkesi Homar bt. Agob nâm Nasrâniye ile sulbî kebîr oğulları Kevork ve Bedros’a münhasıra olduğu lede’ş-şer‘i’l-enver mütehakkık oldukdan sonra kendiden asîl ve anası merkūme Homar Nasrâniye ve karındaşı mesfûr Bedros ile hâlik-i mersûm Artiyon’un li-ebeveyn er karındaşı Mıgırdıç taraflarından husûs-ı âti’z-zikre vekîl olduğu Bogos v. Serkiz ve Manuk v. Avanes nâm Ermeniler şehâdetleriyle sâbit ve sübût-ı vekâletine hükm-i şer‘î lâhık olan Kevork nâm Ermeni meclis-i şer‘-i şerîf-i enverde bâ‘isü’s-sifr İsayi v. Markar nâm Ermeni muvâcehesinde bi’l-asâle ve bi’l-vekâle ikrâr ve takrîr-i kelâm edip medîne-i Üsküdar’da vâki‘ kebabcı fırını demekle ma‘rûf kebîr ekmekçi fırını derûnunda olan ekmekçi âlâtından yirmi beş bargir ve iki kazgan ve yüz yirmi panakut ve dört kürek ve sekiz demir kandil ve iki balta ve on ekmek teknesi ve bir tepsi ve iki tencere ve bir kantar ve beş yüz dirhem ve dört kaval ve iki kilim ve iki minder ve iki yasdık üç sehm i‘tibâriyle bir sehmi babam hâlik-i mesfûr Artiyon ile karındaşı müvekkilim mesfûr Mıgırdıç’ın ale’l-iştirâk ve iki sehmi merkūm İsayi’nin mülk ve hakkı olmağla müvekkilim mesfûr Mıgırdıç ile mûrisimiz babam hâlik-i mesfûrun âlât-ı muharrere-i mezkûrede olan bir sehm hisselerini tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bi-safkatin vâhidetin mesfûr İsayi’ye bin beş yüz guruşa asâleten ve vekâleten bey‘ ve temlîk ü teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr bin beş yüz guruşu babam hâlik-i mesfûr Artiyon ile karındaşı mersûm Mıgırdıç’ın müşteri-yi mesfûra zimmetlerinde cihet-i şer‘îden deyni olan bin beş yüz guruş hakkına asâleten ve vekâleten takas ve mahsûb eylediğimde ol dahi ber-minvâl-i muharrer mukāssa ve kabûl eyledi ba‘de’l-yevm âlât-ı muharrere-i mezkûrede benim ve müvekkillerim mezbûrûn Mıgırdıç ve Bedros ve Homar Nasrâniyenin kat‘an alâka ve medhalimiz kalmayıp âlât-ı muharrere-i mezkûrenin mecmû‘u mesfûr İsayi’nin mülk-i müşterâsı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Muharremi’l-harâm sene 1153. Şuhûdü’l-hâl: Mehmed Ağa b. Ali kethüdâ-yı ekmekçiyân, Yiğitbaşı Ömer Çelebi b. Mehmed, es-Seyyid Ahmed Çelebi b. Musa, Hacı Hasan Moralı, İbrahim Çelebi Karamânî