Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 314 Hüküm no: 453 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Mihal’in inek bahasından alacağı olduğu Haleb tâifesinden Mihal v. İstati nâm zimmî mahfil-i kazâda kasab tâifesinden İsak v. Mosi nâm Yahûdi muvâcehesinde üzerine da‘vâ edip mezbûr İsak zimmetinde herbirinin kıymeti beynimizde ma‘lûm olan yirmi beş aded inek bahâsından cem‘an yirmi iki bin iki yüz elli akçe hakkım olup meblağ-ı mezbûrdan bi’z-zât on beş bin dokuz yüz akçesini mezbûr İsak yedinden ahz u kabz eyleyip zimmetinde altı bin üç yüz elli akçe hakkım kalmışdır, taleb ederim, suâl olunsun dedikde gıbbe’s-suâl mezbûr İsak cevâbında fi’l-vâki‘ müdde‘î-i mezbûra yirmi beş aded inek bahâsından yirmi iki bin iki yüz elli akçe deynim olup lâkin meblağ-ı mezkûrdan bi’d-defe‘at on yedi bin dokuz yüz akçesin îfâ ve teslîm eyleyip ancak zimmetimde dört bin üç yüz elli akçe deynim kalmışdır deyü iki bin akçe ziyâde def‘ da‘vâsı eyledikde ikrârı olan dört bin üç yüz elli akçenin edâsına beyyine taleb olunup meblağ-ı mezbûr iki bin akçeyi îfâ ve teslîm eylediğine beyyine taleb olundukda ityân-ı beyyine için istimhâl etmeğin mehl-i şer‘î verilip mâ-vaka‘a bi’t-taleb ketb olundu. Tahrîren fi’l-yevmi’l-âşir min-Şevvâli’l-mükerrem li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Rıdvan b. Abdullah, Ahmed Beşe çukadâr, Himmet Beşe b. Mehmed, Sûfî Mehmed b. Hüseyin, Ramazan b. Mustafa, Nasuh Beşe b. Mehmed ve gayruhum mine’l-huzzâr.