Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 314 Hüküm no: 452 Orijinal metin no: [66b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Himmet Beşe’nin anne ve babasına kalan evin satıldığı Vilâyet-i Anadolu’da Akşehir kazâsına tâbi‘ Türktorlu? nâm karyeden olup bundan akdem vefât eden Himmet Beşe b. Satılmış’ın verâseti babası mezbûr Satılmış ile vâlidesi Cevri bt. Mehmed nâm hatuna münhasıra olduğu şer‘an müte‘ayyen oldukdan sonra mezbûrân Satılmış ve Cevri taraflarından husûs-ı âti’z-zikre vekîl olup vekâleti hasm-ı câhid-i şer‘î mahzarında Bayram b. Oruç ve Musa b. Ali şehâdetleri ile şer‘an sâbit olan mezbûrânın oğlu Hüseyin mahfil-i kazâda işbu râfi‘u’l-kitâb Mustafa Bey b. Kulak Sinan mahzarında bi’l-vekâle ikrâr ve takrîr-i kelâm edip müvekkilân-ı mezbûrân müteveffâ-i merkūmdan intikāl edip mahmiye-i İstanbul’da Pazaro[ğlu]? Sinan Bey Mahallesi’nde vâki‘ bir tarafı el-Hâc Ali mülkü ve bir tarafı Hasan Beşe mülkü ve bir tarafı Emine Hatun mülkü ve bir tarafı tarîk-i hâs ile mahdûd arsasının merhûm el-Hâc Mahmud Vakfı’na senede yetmiş akçe mukāta‘ası olan binâsı mülk menzili merkūm Mustafa Bey’in yine kazâ-i mezbûra tâbi‘ Ensari nâm karye sınırında vâki‘ bir tarafdan Ferahşad mülkü ve bir tarafdan İmâm Hüdaverdi Vakfı’na ve bir tarafdan tarîk-i âmma müntehî olan tahmînen iki buçuk [zirâ‘] mülk bağ ve bir doru kolanlı kısrak ve bir doru dişi kör? tay ve iki yüz nakid akçe semen ile tarafeynden îcâb ve kabûlü hâvî bey‘-i bâtt-ı sahîh-i şer‘î ile vekâleti hasebiyle merkūm Mustafa Bey’e bey‘ ve teslîm edip ol dahi iştirâ ve tesellüm eyledi, min-ba‘d menzil-i mezbûr mülk-i müşterâsıdır, keyfe mâ yeşâ’ ve yehtâr mutasarrıf olsun dedikde gıbbe’t-tasdîk ve’t-taleb. Sene 1064.