Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 315 Hüküm no: 455 Orijinal metin no: [67a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmed’in fes bahasından Osman’dan alacağı olduğu Sebeb-i tahrîr-i kitâb-ı şer‘î ve mûceb-i tastîr-i hitâb-ı mer‘î oldur ki mahmiye-i İstanbul’da Tahtelkal‘a kurbünde vâki‘ tüccâr tâifesinden işbu nâkılü’l-kitâb el-Hâc Mehmed’den meşhûdün-bih âti’l-beyânı vechi üzere da‘vâ-yı sahîha-i şer‘iyye ile mesbûk istişhâd-ı şer‘î sudûrundan sonra udûl-i Müslimînden el-Hâc İsmail b. el-Hâc Ali b. el-Hâc Ahmed ve eş-Şeyh Buhari b. Abdullah b. Abdullah nâm kimesneler nakl ve tahvîl için mahall-i cerh ve ta‘dîlde herbiri edâ-yı şehâdet-i şer‘iyye edip hâlâ Mısr-ı Kāhire’de sükûnu mesmû‘umuz olan Osman nâm kimesne zimmetinde on deste fes bahâsından doksan beş kıt‘a riyâlî [guruş] hakkı olup meclis-i şer‘-i şerîfde müsteşhed-i mezbûr el-Hâc Mehmed hatta meblağ-ı mezbûru bizim huzûrumuzda merkūmdan da‘vâ ve taleb ve isbât-ı müdde‘â eyleyip lâkin kable’l-edâ firâr etmekle meblağ-ı mezbûr zimmetinde kalmış idi, el-ân müsteşhed-i mezbûr için hak taleb ve ahz vardır, biz bu husûsa şâhidleriz şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a oldukdan sonra vâki‘ hâli gıbbe’t-taleb ve’s-suâl a‘lemü’l-ulemâi’l-mütebahhirîn efdâlü’l-fudalâi’l-muhakkıkīn yenbû‘ü’l-fazli ve’l-yakīn hüccetü’l-hakkı ale’l-halkı ecma‘în bi’l-fi‘il medîne-i Mısr-ı Kāhire’de hâkimi’ş-şer‘i’ş-şerîf olan fazîletli efendi hazretlerinin huzûr-ı şerîflerine ve usûl-i nüvvâbdan bu kitâb-ı müstetâb vusûl bulan efendilerin meclis-i münîflerine inhâ olundu ki lede’l-vusûl amel bi’l-medlûl buyurmaları ile indallâhi’l-Meliki’l-Müte‘âl musâb ve me’cûr olalar. Tahrîren fi’l-yevmi’l-hâdî aşer min-Şevvâli’l-mükerrem li-sene erba‘a ve sittin ve elf. Şuhûdü’l-hâl: el-Hâc Mesud [b.] el-Hâc Ahmed, Şeyh Mehmed b. Şeyh Mansur, el-Hâc Said b. Abdullah. Bu naklin yeri bu mahalle kayd mümkün olmadığı için iki kâğıd muahhar kaydolunmuşdur, böyle ma‘lûm ola ve’s-selâm.