Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 316 Hüküm no: 456 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin kölesini azat ettiği Sicillât ihrâkından sonra sâhibi inhâsıyla bu ıtıknâme bu mahalle kaydolundu. Tahrîren fi’l-yevmi’s-sâbi‘ aşer min-Zilhicceti’l-harâm sene [10]63. (Mühür) Mâ-fîhi mine’l-ikrâr bi’l-i‘tirâf ve’t-tahrîr cerâ lede’l-fakīr ileyhi te‘âlâ Hüseyin b. Ebîbekir el-müvellâ hilâfeten bi-mahkemeti Ahi Çelebi bi-medîneti Kostantıniyye el-mahmiye -afâ anhümâ Rabbi’l-beriyye-. Mahmiye-i İstanbul’da Süleymâniye kurbünde sâkin olup sabıkā reisü’l-küttâb olan umdetü erbâbi’t-tahrîr ve’l-kalem zübdetü ashâbi’t-takrîr ve’r-rakam Mehmed Efendi mahfil-i şer‘-i şerifde kendülere rıkkını mu‘terif olan açık kaşlı, kara gözlü Moskoviyyü’l-asl hâfız-ı hâze’l-kitâb Süleyman b. Abdullah nâm abd-i memlûkü mahzarında ikrâr ve takrîr-i kelâm edip memlûküm mevsûf-ı mezbûr Süleyman’ı hasbeten lillâhi te‘âlâ ve hasbeten li-rûhi rasûlihi’l-mu‘allâ ve amelen bimâ-kāle’n-nebiyyü’l-muhtâr: “Men a‘taka rakabeten mümineten a‘taka’llâhu te‘âlâ bi-külli udvin minhâ udven minhu mine’n-nâr” âzâd ve i‘tâk ve kayd-ı rıkdan ıtlâk eyledim, ba‘de’l-yevm mezbûr Süleyman sâir ahrâr-ı asliyyîn gibi hür olup üzerinde hakk-ı velâdan gayrı hakkım kalmadı dedikde mâ-hüve’l-vâki‘ bi’t-taleb ketb ü sebt olundu. Fi’l-yevmi’t-tâsi‘ min-Şevvâli’l-mükerrem li-sene erba‘a ve sittin ve elf. Şuhûdü’l-hâl: Fahrü’l-kitâb Mehmed Efendi b. İsmail Efendi, Kethüdâ-yı Hızır Efendi, Emir Çelebi, Receb Beşe ve Yusuf Bey b. Ömer.