Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 318 Hüküm no: 459 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden el-Hâc Ömer Bey’in muhallefatını alıp vârislerine ulaştırmak üzere Ramazan b. el-Hâc Osman’ın vekil tayini Fi’l-asl vilâyet-i Rumeli’nde Prepol kazâsına tâbi‘ Tolcu nâm karyeden olup Mısr-ı Kāhire’de Hân-ı Halil’de sâkin iken bundan akdem [vefât eden] el-Hâc Ömer Bey b. Seydî’nin verâseti karye-i mezbûrede sâkin li-ebeveyn er karındaşı İshak ile yine li-ebeveyn kız karındaşı Latife’ye münhasıra olup kable’l-kısmet mezbûr İshak dahi vefât edip <> verâseti zevce-i metrûkesi Sâliha bt. Hasan ile sulbiye sagīr oğulları Hüseyin ve Şa‘ban ve Ahmed ve sulbiye sagīre kızları Kamer Güle’ye? münhasıra olduğu şer‘an mütebeyyen ve mezbûre Sâliha sıgār-ı mezbûrînin tesviye-i umûruna kıbel-i şer‘îden mansûbe vasîleri olduğu müte‘ayyen oldukdan sonra mezbûretân Latife ve Sâliha taraflarından husûs-ı âti’l-beyâna vekâlet iddi‘â eden işbu râfi‘u’l-kitâb Ramazan b. el-Hâc Osman nâm kimesne mahfil-i kazâda sabıkā Sivas beylerbeyisi olup müteveffâ-i mezbûr el-Hâc Ömer’in li-ebeveyn ammisi olup muhallefâtına vâzı‘u’l-yed olan emîrü’l-ümerâi’l-kirâm kebîrü’l-küberâi’l-kirâm Şahbaz Paşa hazretleri taraf-ı şerîflerinden husûs-ı âti’l-beyâna vekîl olup vekâleti hasm-ı münkir mahzarında Ahmed Bey [b.] Abdullah el-cündî ve Derviş Bey b. Oruç nâm kimesneler şehâdetleri ile şer‘an sâbite olan Selim Ağa b. Pîrî mahzarında üzerine da‘vâ ve takrîr-i kelâm edip mezbûretân Sâliha ve Latife müteveffâ-i mezbûrun muhallefâtını paşa-yı müşârun-ileyh hazretlerinden vesâir vâzı‘u’l-yed olanlardan da‘vâ ve talebe ve ahz u kabz ve kendülere îsâle ve lede’l-hükkâmi’l-kirâm kabz ve îsâl mütevakkıf olan umûra taraflarından beni vekîl edip ben dahi vekâlet-i mezbûreyi kabûl ve merâsimini edâya müte‘ahhid olmuş idim. Binâen-aleyh müteveffâ-i mezbûrun muhallefâtını müşârun-ileyh paşa hazretlerinden taleb eylediğimde bana teslîmden imtinâ‘ eder, vâki‘ü’l-hâl vekîl-i mezbûr Selim Ağa’dan suâl olunup cânib-i şer‘den teslîmine tenbîh olunmak matlûbumdur dedikde gıbbe’s-suâl vekîl-i mezbûr Selim Ağa cevâbında müvekkili paşa-yı mûmâ-ileyh hazretleri müteveffâ-i mezbûr el-Hâc Ömer muhallefâta vâzı‘u’l-yed <> eylediklerini ikrâr ve merkūmetân Latife ve Sâliha müdde‘î-i mezbûr Ramazan’ı vech-i muharrer üzere vekîl eylediklerini inkâr edicek mezbûr Ramazan’dan da‘vâsına mutâbık beyyine taleb olundukda udûl-i Müslimîn’den el-Hâc Murad b. Musa ve el-Hâc Osman b. Ca‘fer ve Ömer Beşe b. Arslan ve Hasan b. Oruç nâm kimesneler li-ecli’ş-şehâde meclis-i şer‘a hâzirûn olup isre’l-istişhâd fi’l-vâki‘ mezbûretân Latife ve Sâliha müteveffâ-i mezbûrun muhallefâtını paşa-yı müşârun-ileyh hazretlerinden vesâir vâzı‘u’l-yed olanlardan da‘vâ ve talebe ve ahz u kabza ve kendüye îsâle mütevakkıf olan umûrun cem‘îsine müdde‘î-i mezbûr Ramazan’ı vekîl taraflarından bizim huzûrumuzda vekîl edip mezbûr Ramazan dahi vekâlet-i mezbûreyi kabûl ve merâsimini edâya müte‘ahhid oldu, biz bu husûsa bu vech üzere şâhidleriz şehâdet [dahi] ederiz deyü herbiri edâ-yı şehâdet-i şer‘iyye eylediklerinde mûcebince müteveffâ-i mezbûrun muhallefâtını müşârun-ileyh hazretleri vekîl-i mezbûr Ramazan’a teslîm etmek üzere vekîl-i mezbûr Selim Ağa’ya tenbîh olunup mâ-vaka‘a ketb olundu. Şuhûdü’l-hâl: İbrahim Çelebi b. Davud er-ressâm, Pîrî Bey b. Hüseyin, Rıdvan b. Abdullah Mehmed Çelebi b. Hüseyin, Pîrî Beşe b. el-Hâc Şa‘ban el-cündî, Ramazan b. Abdullah ve gayruhum mine’l-huzzâr.