Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 317 Hüküm no: 458 Orijinal metin no: [67b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Mehmed Reis’in alacağına el-Hâc Ramazan’ın vekil tayin edildiği Mahrûse-i Galata’da el-Hâc Kasım odalarında sâkin iken bundan akdem vefât eden Mehmed Reis b. Süleyman nâm kimesnenin verâseti hâlâ cezîre-i Tunus sâkinelerinden olan vâlidesi Zeyneb nâm hatun ile sulbî kebîr oğlu Ramazan’a münhasıra olduğu şer‘an sâbit ve mütehakkık oldukdan sonra mezbûrân Zeyneb ve Ramazan taraflarından husûs-ı âti’l-beyânı da‘vâ ve taleb ve ahz u kabza ve kendilere îsâle ve kabz [ve] îsâl mütevakkıf olduğu umûrun cem‘îsine kabûlüne mevkūfe vekâlet-i mutlaka ile iddi‘â eden işbu bâ‘isü’l-kitâb el-Hâc Ramazan b. Mehmed mahfil-i kazâda tüccârdan Fakih Yahya b. Salih mahzarında üzerine da‘vâ edip mezbûr Fakih Yahya müteveffâ-i mezbûrun gāib ani’l-meclis Salim Reis nâm cezzâr zimmetinde cihet-i deyn-i şer‘îden olan dört bin akçe hakkını ahz u kabz etmişdir, vekâlet-i mezbûreyi kabûl eylemediğime binâen meblağ-ı mezbûreyi taleb ederim, suâl olunsun dedikde gıbbe’s-suâl mezbûr Fakih Yahya cevâbında hâl minvâl-i muharrer üzere olduğunu ikrâr edip lâkin müdde‘î-i mezbûrun mezbûre Zeyneb Hatun ile merkūm Ramazan taraflarından vekîl olduğunu inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden ve sikāt-ı muvahhidînden es-Seyyid Kasım b. es-Seyyid Mehmed ve el-Hâc Mansur b. Abdülaziz nâm kimesne li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr el-Hâc Ramazan’ı mezbûre Zeyneb ve merkūm Ramazan [68a] müteveffâ-i mezbûrun vâzı‘u’l-yed olanlardan muhallefâtını ve zimem-i nâsda olan nukūdunu da‘vâ ve taleb ve ahz u kabz ve kendilere îsâle ve kabz ve îsâl mütevakkıf olduğu umûrun cem‘îsine taraflarından bizim huzûrumuzda mezbûr el-Hâc Ramazan’ın kabûlüne mevkūfe vekâlet-i mutlaka ile vekîl ve menâbına nâib nasb ve ta‘yîn eylediler, biz bu husûsa bu vech üzere şâhidleriz şehâdet dahi ederiz deyü herbiri edâ-yı şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince meblağ-ı mezbûru müdde‘î-i mezbûr el-Hâc Ramazan’a edâ ve teslîm etmek üzere mezbûr Fakih Yahya’ya tenbîh olunup mâ-hüve’l-vâki‘ gıbbe’t-taleb ketb ü sebt olundu. Fi’l-yevmi’s-sâlis aşer min-şehri Ramazani’l-mübârek li-sene erba‘a ve sittin ve elf. Şuhûdü’l-hâl: el-Hâc Ahmed b. el-Hâc Said b. Ali, el-Hâc Ebûbekir b. Ebuzeyd, el-Hâc Salim b. Cum‘a, Pîrî Beşe b. Hüseyin ve gayruhum mine’l-huzzâr.