Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 230 Hüküm no: 210 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Beşe’nin Fatıma Hatun’a olan borcunu vekili Helvacı Süleyman’a ödediği İsbât-ı vekâlet Vilâyet-i Anadolu’da medîne-i Kayseriye kazâsına tâbi‘ Gesi karyesinde sâkine Fâtıma bt. Osman Beşe b. Ali nâm hatun tarafından ber-vech-i âtî vekâlet iddi‘â eden Helvacı Süleyman b. Hamza nâm kimesne meclis-i şer‘-i hatîr-ı lâzımü’t-tevkīrde Halil Beşe b. Mehmed nâm kimesne mahzarında üzerine da‘vâ ve takrîr-i kelâm edip müvekkile-i mezbûre Fâtıma Hatun İstanbul’da Hadîce Hanım Vakfı’ndan olup Balaban Ağa mahallesinde vâki‘ ma‘lûmü’l-hudûd ve’l-müştemilât bir bâb vakıf menzilden altı sehm i‘tibâriyle bir sehm hissesini bedel-i misli ve ma‘rifet-i mütevellî ile âhara ferâğa vesâir zimem-i nâsda olan hukūkunu taleb ve da‘vâ ve ahz u kabza ve kendüye îsâle ve bunlar mutavakkıf olduğu umûrun küllîsine tarafından beni vekîl ve nâib-i menâb nasb u ta‘yîn etmekle ben dahi vekâlet-i mezkûreyi kabûl eylediğime binâen müvekkile-i mezbûrenin merkūm Halil Beşe zimmetinde cihet-i deyn-i şer‘îden otuz dört guruş hakkı olmağla bi’l-vekâle taleb ederim suâl olunsun dedikde gıbbe’s-suâl mezbûr Halil Beşe cevâbında deyn-i mezkûru ikrâr lâkin müdde‘î-i mezbûrun ber-vech-i muharrer vekâletini inkâr edicek müdde‘î-i mezbûrdan vech-i meşrûh üzere vekâletine beyyine taleb olundukda udûl-ı ahrâr-ı ricâl-i Müslimînden ve karye-i mezkûre ahâlîsinden olup mahmiye-i İstanbul’da Sultan Mehmed Câmi‘-i şerîfi kurbünde sâkin Doğramacı Mehmed Beşe b. İbrahim ve Mustafa Beşe b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka medîne-i Kayseriye kazâsına tâbi‘ Gesi karyesinde sâkine Fâtıma bt. Osman Beşe b. Ali nâm hatun İstanbul’da Hadîce Hanım Vakfı’ndan olup Balaban Ağa mahallesinde vâki‘ ma‘lûmü’l-hudûd ve’l-müştemilât bir bâb vakıf menzilden altı sehm i‘tibâriyle bir sehm hissesini bedel-i misli ve ma‘rifet-i mütevellî ile âhara ferâğa eve sâir zimem-i nâsda olan hukūkunu taleb ve da‘vâ ve ahz u kabza ve kendüye îsâle ve bunlar mutavakkıf olduğu umûrun küllîsine tarafından işbu müdde‘î-i mezbûr Helvacı Süleyman b. Hamza’yı vekîl ve nâib-i menâb nasb u ta‘yîn eyledikde ol dahi vekâlet-i mezkûreyi kabûl eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mezbûr Helvacı Süleyman meclis-i şer‘de merkūm Halil Beşe muvâcehesinde ânifen edâsına tenbîh olunan meblağ-ı mezbûr otuz dört guruşu merkūm Halil Beşe yedinden tamâmen ahz u kabz eyledim dedikde mâ-vaka‘a bi’t-taleb ketb olundu. Fî-gurreti Saferi’l-hayr li-sene selâse ve hamsîn ve mi’e ve elf. Şuhûdü’l-hâl: Baltacı Hüseyin b. Ali, es-Seyyid Mustafa Çelebi b. Abdullah, Du‘âcı Molla Hüseyin b. Hacı Mehmed, Mustafa b. Mehmed