Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 231 Hüküm no: 211 Orijinal metin no: [29b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un evini Ferruh Hatun’a sattığı Mübâya‘a Mahmiye-i İstanbul’da Yenibahçe kurbünde Sinan Paşa mahallesinde sâkine olup zâtını bi’l-ma‘rifet-i şer‘iyye ârifân İmâm Ahmed Efendi b. Şucâeddin ve el-Hâc Hasan Efendi b. Ömer nâm kimesneler ta‘rîfleriyle mu‘arrefe olan Âişe bt. Veliyüddin nâm hatun meclis-i şer‘-i hatîr-ı lâzımü’t-tevkīrde bâ‘isetü hâzihi’l-vesîka Ferruh bt. Abdullah nâm hatun muvâcehesinde ikrâr ve takrîr-i kelâm edip akd-i âtî sudûruna değin yedimde mülk ve hakkım olup mahalle-i mezbûrede vâki‘ bir tarafdan Sarrâc Mustafa Çelebi menzili ve bir tarafdan es-Seyyid Ömer Efendi menzili ve bir tarafdan Hüseyin Beşe mülkü ve bir tarafdan tarîk-i hâs ile mahdûd fevkānî bir bâb oda ve tahtânî bir bâb oda ve bir matbah ve kenîf ve bir mikdâr havluyu muhtevî mülk menzilimi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûre Ferruh Hatun’a yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yüz guruş mutâlebesinden mezbûre Ferruh Hatun’un zimmetini ibrâ ve ıskāt eyledim ba‘de’l-yevm menzil-i mahdûd-ı mezkûrda benim alâkam kalmayıp mezbûr Ferruh Hatun’un mülk-i müşterâsı olmuşdur keyfe mâ teşâ ve tehtâr mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Saferi’l-hayr li-sene selâse ve hamsîn ve mi’e ve elf. Şuhûdü’l-hâl: es-Seyyid Mustafa Çelebi b. Osman, Molla Hidayetullah b. Ahmed Efendi, Molla Halil b. Abdülcelil, Yedekcizâde el-Hâc Ömer Ağa, Habib Beşe b. İbrahim, Mehmed Ağa b. İbrahim dâmâd-ı Yedekcizâde, Çavuş Halîfe İbrahim Efendi b. Mehmed, Sarrâc Mustafa Çelebi b. Abdi, Hasan Ağa tâbi‘-i fazîletlü Sırrızâde