Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 255 Hüküm no: 237 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe ile kızını yanına verdiği Lütfullah Çelebi arasındaki nafaka davasına sulh bedeli karşılığı son verildiği Mahrûse-i Galata’da Câmi‘-i kebîr mahallesinde sâkin bâ‘isü’l-kitâb es-Seyyid Lütfullah Çelebi b. es-Seyyid el-Hâc Hüseyin nâm kimesne meclis-i şer‘-i şerîf-i enverde Mehmed Beşe b. Bayram nâm kimesne mahzarında ikrâr-ı tâm ve takrîr-i kelâm edip târîh-i kitâbdan otuz dört buçuk ay mukaddem işbu hâzıra bi’l-meclis tahmînen on yaşında olan sulbiye kebîre kızı Havva’yı li-ecli’t-terebbî ve tebennî bana def‘ ü teslîm edip ben dahi babası mezbûr Mehmed Beşe üzerine rücû‘a kıbel-i şer‘den bâ-hüccet-i şer‘iyye yevmî ikişer para nafaka-bahâ farz ve takdîr olunup hâlâ sagīre-i mezbûreyi babası mezbûr Mehmed Beşe’ye def‘ ü teslîm eylediğimde nafaka-i mefrûza-i mezkûreden müctemi‘ olan …? beynimize muslihûn tavassut edip da‘vâ-yı mezkûremden beni mezbûr Mehmed Beşe ile on guruş üzerine inşâ-i akd-i sulh eylediklerinde ben dahi sulh-ı mezkûru ba‘de’l-kabûl bedel-i sulh olan meblağ-ı mezkûr on guruşu mezbûr Mehmed Beşe’nin yedinden tamâmen ahz u kabz eylediğimden sonra mâ‘adâsı olan yirmi bir guruşa müte‘allıka âmme-i da‘vâdan mezbûr Mehmed Beşe’nin zimmetini ibrâ-i âmm-ı katı‘u’n-nizâ‘la ibrâ ve ıskāt eylediğimde ol dahi sagīre-i mezbûre Havva’nın müddet-i mezkûrda ecr-i misil da‘vâsına müte‘allıka âmme-i da‘vâdan ve kâffe-i mutâlebâtdan ve eymân [ve] muhâsamâtdan kezâlik zimmetimi ibrâ-i âmm-ı râfi‘ü’l-hısâm ile ibrâ ve ıskāt eyledi ba‘de’l-yevm sagīre-i mezbûre Havva ba‘de’l-bülûğ müddet-i müzkûrede ecr-i misli için benden bir nesne taleb ve da‘vâ ve ahz u kabz ederse me’hûzuna babası mezbûr Mehmed Beşe kefîl ve zâmin oldu dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 min-S sene 1153. [34a] Şuhûdü’l-hâl: Molla Ahmed b. Mehmed, Mustafa Çelebi b. Mehmed el-müezzin, Abdullah Çelebi b. Hüseyin, es-Seyyid el-Hâc Mustafa b. el-Hâc Süleyman, Ali Çelebi b. Mehmed, Halil Reis b. Osman, Mustafa b. Mustafa