Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 256 Hüküm no: 239 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Emetullah Hatun’un kocası Hulusi Mehmed Efendi’deki alacaklarını vasisi olan Hatice Hatun’un tahsil ettiği Husûs-ı âti’l-beyânı mahallinde ketb ü tahrîri için bi’l-iltimâs cânib-i şer‘-i enverden irsâl olunan Mevlânâ Ömer Efendi b. Nurullah Efendi mahmiye-i İstanbul’da Sultan Hamamı kurbünde Hoca Kasım Gönânî mahallesinde merhûm Bakizâde zevcesi Hadîce nâm hatunun sâkine olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mahalle-i mezbûrede sâkine iken bundan akdem vefât eden Emetullah Hatun bt. Abdurrahman’ın verâseti zevci fahrü’l-kuzât Hulusi Mehmed Efendi b. Şeyh Nef‘i Efendi ve sadrî sagīr oğulları Abdülbaki ve Abdulkadir b. Cafer Efendi vâlidesi mezbûre Hadîce Hatun bt. Abdullah’a ba‘de’l-ihzâr sagīrân-ı mezbûrânın kıbel-i şer‘-i enverden tesviye-i umûrlarına vasiye-i mansûbeleri ceddeleri ve zâtı bi’t-ta‘rîfi’ş-şer‘î ârifân Helvacı Mehmed Çelebi b. Halil ve Halil Çelebi b. Mehmed nâm kimesne ta‘rîfleriyle mu‘arrefe mezbûre Hadîce Hatun meclis-i ma‘kūd-ı mezkûrda işbu râfi‘ü’l-kitâb mûmâ-ileyh Hulusi Mehmed Efendi mahzarında asâleten ve vesâyeten ikrâr-ı tâm ve takrîr-i kelâm edip târîh-i kitâbdan altı ay mukaddem vasîleri olduğum sagīrân-ı mezbûrânın mâllarından onu on bir buçuk hesâbı üzere devr-i şer‘iyle üvey babaları işbu mûmâ-ileyh Hulusi Mehmed Efendi’ye iki yüz guruş ikrâz ve teslîm ol dahi yedimden ahz u kabz etmiş idi, hâlâ meblağ-ı mezbûr iki yüz guruşu ve meblağ-ı mezbûrun târîh-i kitâba gelince kısta’l-yevm hesâbı üzere altı aya isâbet eden on beş guruş ribhini ve müteveffât-ı mezkûrenin mûmâ-ileyh Hulusi Mehmed Efendi zimmetinde ma‘kūdün-aleyh olan dokuz bin akçe mehr-i müeccelinden asâleten ve vesâyeten olan elli bir guruş hisselerimiz ki min-haysü’l-mecmû‘ iki [bin] altmış altı guruş ile mûmâ-ileyh Mehmed Efendi yedinde kendi mâlımdan dahi vedî‘a olan bir çift altın bilezik ve ikişer zümrüd ayaklı bir çift altın küpeyi mûmâ-ileyh Hulusi Mehmed Efendi yedinden asâleten ve vesâyeten tamâmen ahz u kabz eyledim fîmâ-ba‘d kızım ve mûrisem müteveffât-ı mezkûrenin ma‘lûm ve mechûl terekesine ve zikr olunan iki yüz guruş ve ribhine ve bilezik ve küpelere müte‘allıka âmme-i de‘âvî ve mutâlebât ve kâffe-i eymân ve muhâsamâtdan zevc-i mûmâ-ileyh Hulusi Mehmed Efendi’nin zimmetini ibrâ-i âmm-ı katı‘u’n-nizâ‘la asâleten ve vesâyeten ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan ümenâ-i şer‘le meclis-i şer‘a gelip alâ-vukū‘ihi inhâ ve takrîr etmeğin mâ hüve’l-vâki‘ bi’t-taleb ketb olundu. Fî 8 S sene 1153. Şuhûdü’l-hâl: Helvacı Mehmed Çelebi b. Halil, Mustafa Ağa b. İbrahim, Mustafa Odabaşı b. Mehmed, es-Seyyid Zeynelabidin b. es-Seyyid Hanifi, mefharü’l-müderrisîni’l-kirâm es-Seyyid Mehmed Tahir Efendi b. el-merhûm Mahmud Efendi ve Halil Çelebi b. Mehmed, helvacı dâmâdı Hasan b. Musli, Mehmed Ağa b. Ali el-mübâşir, Mehmed Beşe b. Ahmed, el-Hâc Mustafa b. el-Hâc Mehmed, Mustafa b. Ahmed, el-Hâc Ali b. Mustafa el-Hanik?, Halil Çelebi b. Hüseyin el-Hanik?, Ahmed Çelebi b. Halil el-Hanik?, Hüseyin Ağa b. Satılmış el-Hanik? ve Ahmed b. Musa