Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 257 Hüküm no: 240 Orijinal metin no: [34a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hıristodoli v. Corci’nin istiğlâl yoluyla Emine Hatun’dan borç aldığı İstiğlâl Mahrûse-i Galata muzâfâtından kasaba-i Kasımpaşa’da Tatavla nâm karye sâkinlerinden Hıristodoli v. Corci nâm zimmî meclis-i şer‘-i hatîr-ı lâzımü’t-tevkīrde mahmiye-i İstanbul’da Cerrâhpaşa Câmi‘-i şerîfi civârında el-Hâc Ahmed mahallesinde sâkine ve zâtı bi’t-ta‘rîfi’ş-şer‘î ârifân Ali Çelebi b. Abdülhalim ve Hacı Kasım b. Ömer nâm kimesne ta‘rîfleriyle mu‘arrefe olan râfi‘atü hâze’l-kitâb Emine Hatun bt. Ahmed mahzarında ikrâr-ı tâm ve takrîr-i kelâm edip istiğlâl-i âti’z-zikrin sudûruna değin yedimde mülk ve hakkım olup sâlifü’z-zikr karyede vâki‘ bir tarafdan benim âhar mülk menzilim ve bir tarafdan Argiri v. Mihal mülkü ve bir tarafdan tarla ve bir tarafdan tarîk-i âm ile mahdûd ve fevkānî iki bâb oda ve tahtânî iki bâb oda ve bir bi’r-i mâ ve bir mikdâr eşcâr-ı müsmire ve gayr-ı müsmireyi hâvî bahçeyi müştemil mülk menzilimi fârigan ani’ş-şevâgil cemî‘ tevâbi‘ ve levâhıkıyla mezbûre Emine Hatun’a bi-tarîkı’l-istiğlâl beş yüz guruşa bey‘ ve teslîm eylediğimde ol dahi ber-vech-i muharrer iştirâ ve tesellüm ve kabûl eylediklerinden sonra semeni olan meblağ-ı mezbûr beş yüz guruşu mezbûre Emine Hatun yedinden tamâmen ahz u kabz eylediğimden sonra mezbûre Emine Hatun menzil-i mahdûd-ı mezkûru ba‘de’t-tahliyeti’ş-şer‘iyye ve’t-tekābuzü’l-mer‘î târîh-i kitâbdan iki sene tamâmına değin yüz elli guruşa bana îcâr ve teslîm eylediğinde ben dahi ber-vech-i muharrer istîcâr ve kabûl eyledim dedikde gıbbe’t-tasdîkı’ş-şer‘î mesfûr Hıristodoli meclis-i şer‘de zikri mürûr eden Hacı Ahmed mahallesi sâkinlerinden Osman Çelebi b. Ömer nâm kimesne mahzarında i‘âde-i kelâm edip mebî‘-i mezbûr hakīkatde rehin ve meblağ-ı mezbûr mezbûre Emine Hatun’a zimmetimde edâsı lâzım deynim olmağla meblağ-ı mezbûr ile ücret-i merkūme[yi] müddet-i mezkûre tamâmında mezbûre Emine Hatun’a edâ edemezsem menzil-i mezkûru sûk-ı sultânîde müzâyede ile ba‘de’n-nidâ ve inkıtâ‘ semen-i misliyle âhara bey‘ ve teslîm ve semenini ba‘de’l-kabz deyn-i mezkûr ile ücret-i merkūmeyi mezbûre Emine Hatun’a edâ ve teslîm fazla kalır ise bana îsâl ve teslîme ve bunlar mutavakkıf olduğu umûrun küllîsine küllemâ aziltüke fe-ente vekîlî mefhûmu üzere azl ü in‘izâlden masûne ve akd-i rehinde meşrûta vekâlet-i devriye ile mezbûr Osman Çelebi’yi tarafımdan vekîl ve nâib-i menâb nasb u ta‘yîn eyledim dedikde mezbûr Osman Çelebi dahi ber-vech-i muharrer vekâlet-i mezbûreyi kabûl ve merâsimini edâya ta‘ahhüd ve iltizâm etmeğin mâ hüve’l-vâki‘ bi’t-taleb ketb ve terkîm olundu. Fi’l-yevmi’s-sâmin min-Saferi’l-hayr li-sene selâse ve hamsîn ve mi’e ve elf. Şuhûdü’l-hâl: el-Hâc Mustafa b. el-Hâc Mehmed, Ali Çelebi b. Abdullah, Hüseyin Çelebi b. Hacı Mehmed, Süleyman b. Abdullah, Hasan Beşe b. Abdullah, Hacı Süleyman b. Abdullah, el-Hâc Kasım b. Ömer ve Ali Çelebi b. Abdülhalim ve Ali b. Abdullah