Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 320 Hüküm no: 463 Orijinal metin no: [68b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmed’in fes bahasından Kahire’de bulunan Ahmed’de alacağı olduğu Mahmiye-i İstanbul’da Tahtelkal‘a kurbünde vâki‘ tüccâr tâifesinden işbu nâkilü’l-kitâb el-Hâc Mehmed’den meşhûdün-bih âti’l-beyân vechi üzere da‘vâ-yı sahîha-i şer‘iyye ile mesbûk istişhâd-ı şer‘î sudûrundan sonra udûl-i Müslimîn’den el-Hâc İsmail b. el-Hâc Ali b. el-Hâc Ahmed ve eş-Şeyh Hicâzî b. Abdullah b. Abdullah nâm kimesneler nakl ve tahvîl [için] mahall-i cerh ve ta‘dîlde herbiri edâ-yı şehâdet-i şer‘iyye edip hâlen Mısr-ı Kāhire’de sükûnu mesmû‘um olan Ahmed nâm kimesne zimmetinde fes bahâsından doksan beş kıt‘a riyâlî guruş ve karz-ı şer‘îden on? kıt‘a riyâlî guruş hakkı olup meclis-i şer‘-i şerîfde müsteşhed-i mezbûr el-Hâc Mehmed hattâ meblağ-ı mezbûra bizim huzûrumuzda merkūmdan da‘vâ ve taleb ve isbât-ı müdde‘â eyleyip lâkin [kable]’l-edâ firâr etmekle meblağ zimmetinde kalmış idi. El-ân müsteşhed-i mezbûr için hak taleb ve ahz vardır, biz bu husûsa şâhidleriz ve şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de ri‘âyet-i şerâiti’l-kabûl şehâdetleri hayyiz-i kabûlde vâkı‘a oldukdan sonra vâki‘ hâl gıbbe’t-taleb ve’s-suâl a‘lemü’l-ulemâi’l-mütebahhirîn ve efdâlü’l-fudalâi’l-mütehakkıkīn yenbû‘ü’l-fazl ve’l-yakīn hüccetü’l-hakkı ale’l-halkı ecma‘în bi’l-fi‘il medîne-i Mısr-ı Kāhire’de hâkimü’ş-şer‘i’ş-şerîf olan fazîetli efendi hazretlerinin huzûr-ı şerîflerine ve usûl-i nüvvâbdan bu kitâb-ı müstetâb vusûl bulan efendilerin meclis-i münîflerine inhâ olundu ki lede’l-vusûl amel bi’l-medlûl buyurmaları ile indallâhi’l-Meliki’l-Cemîl nâil-i ecr-i cezîl olalar. Fî-Şevvâli’l-mükerrem li-sene erba‘a ve sittin ve elf. Şuhûdü’l-hâl: el-Hâc Mesud b. el-Hâc Ahmed, Şeyh Mehmed b. Şeyh Mansur el-Halvânî, el-Hâc Said b. Abdullah, el-Hâc Hicâzî b. ( ).