Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 272 Hüküm no: 260 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Belgrad seferinde şehit olan Osman Odabaşı’nın varislerinin Mustafa Beşe’yi vekil tayin ettikleri Vekâlet Mahmiye-i İstanbul’da Üskübî mahallesi sâkinlerinden Dergâh-ı âlî dâme mahfûfen bi’l-me‘âlî yeniçeri tâifesinden otuz beş sekbanları odabaşısı iken bundan akdem Belgrad sefer-i zafer-rehînde şehîden vefât eden Osman Odabaşı b. Debbâğzâde Mustafa Dede’nin verâseti zevce-i menkûha-i metrûkesi Âişe bt. Abdullah nâm hatun ile sulbî sagīr oğulları Mehmed ve Mustafa’ya münhasıra olduğu lede’ş-şer‘i’l-enver zâhir ve mütehakkık oldukdan sonra sagīrân-ı mezbûrânın tesviye-i umûrlarına kıbel-i şer‘-i enverden vasiye-i mansûbeleri ve zâtı bi’t-ta‘rîfi’ş-şer‘î ârifân Mehmed Çelebi b. Abdullah ve Ahmed Çelebi b. Yusuf nâm kimesneler ta‘rîfleriyle mu‘arrefe olan zevce-i mezbûre Âişe Hatun meclis-i şer‘-i hatîr-ı lâzımü’t-tevkīrde işbu râfi‘ü’l-kitâb Mustafa Beşe b. Mehmed nâm kimesne mahzarında asâleten ve vesâyeten ikrâr-ı tâm ve takrîr-i kelâm edip mûrisimiz zevcem müteveffâ-yı mezbûr Osman Odabaşı’nın terekesinden olup vilâyet-i Anadolu’da medîne-i Kastamonu’da vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât menzil ve bahçesini ve sâir mevrûse ve müşteriye akār ve mankūl cemî‘ emlâk [ve] eşyâsını vâzı‘u’l-yed olanlardan taleb ve da‘vâ ve ahz u kabz ve ba‘de’l-kabz âhara ba‘de’l-müzâyede semen-i misilleriyle âhara bey‘ ü teslîm ve semenlerini ahz u kabz ve bana îsâle ve taleb ve da‘vâ ve ahz u kabz ona mutavakkıf olduğu umûrun küllîsine mezbûr Mustafa Beşe’yi asâleten ve vesâyeten tarafımdan vekîl ve nâib-i menâb nasb u ta‘yîn eyledim dedikde ol dahi vekâlet-i mezbûreyi kabûl ve merâsimini alâ-mâ yenbağī edâya ta‘ahhüd ve iltizâm etmeğin mâ hüve’l-vâki‘ bi’t-taleb ketb olundu. Fî 14 S sene 1153. Şuhûdü’l-hâl: es-Seyyid Musa Çelebi b. Ramazan, Durmuş b. Bayram, es-Seyyid Ahmed Çelebi b. Musa, Mustafa b. Bayram