Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 271 Hüküm no: 259 Orijinal metin no: [36b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Mehmed’in Mustafa b. Mehmed’deki alacağını ispatlayamadığı Mu‘ârazadan men‘ Dârü’s-saltanati’l-aliyye Kostantıniyyetü’l-mahmiyede merhûm Sultan Süleyman -aleyhi rahmetü rabbühü’l-gufrân- medresesinde sâkin Molla Mehmed b. Yusuf nâm kimesne meclis-i şer‘-i şerîf-i enverde bâ‘is-i hâze’l-kitâb Mustafa b. Mehmed nâm kimesne mahzarında üzerine da‘vâ ve takrîr-i kelâm edip mezbûr Mustafa’ya târîh-i kitâbdan iki buçuk sene mukaddem gāibetü ani’l-meclis Fâtıma bt. Osman nâm hatun bana akd ve tezvîc etmek için bi-tarîkı’r-rüşvet on fındık altını ile elli para vermiş idim, hâlâ meblağ-ı mezkûru taleb eylediğimde edâdan imtinâ‘ eder suâl olunup bana edâ ve teslîme mezbûr Mustafa’ya tenbîh olunmak murâdımdır dedikde gıbbe’s-suâl mezbûr Mustafa cevâbında müdde‘î-i mezbûr yedinden ancak otuz bir guruş ve bir rub‘ guruş gāibe-i merkūme Fâtıma Hatun’un mehr-i müecceli olmak üzere ba‘de’l-kabz meblağ-ı mezkûru gāibe-i merkūmeye tamâmen def‘ ü teslîm eyledim deyü def‘ ve ziyâde müdde‘âsını inkâr edicek gıbbe’l-istintâk ve akībe’l-inkâr mezbûr Mustafa’dan def‘-i mezkûruna mutâbık beyyine taleb olundukda udûl-ı ahrâr-ı ricâl-i Müslimînden [37a] ve mahmiye-i mezkûrede Şeyh Ebulvefâ Câmi‘-i şerîfi müezzini Ömer Halîfe b. Mustafa ve Kayyum Mustafa Halîfe b. Mehmed ve Molla İbrahim b. Mehmed nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka işbu Molla Mehmed b. Yusuf târîh-i kitâbdan iki buçuk sene mukaddem gāibetü ani’l-meclis Fâtıma bt. Osman nâm hatunu kendüye akd ve tezvîc eyledikde mezbûrenin mehr-i müecceli olmak üzere mezbûr Mustafa’ya bizim huzûrumuzda otuz bir guruş ve bir rub‘ guruş def‘ ü teslîm ol dahi ba‘de’l-kabz gāibe-i merkūmeye def‘ ve teslîm edip bizi işhâd etmiş idi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle oldukdan sonra müdde‘î-i mezbûr ziyâde müdde‘âsını bir vechile beyâna kādir olmayıp tahlîfe dahi tâlib olmamağın mûcebiyle müdde‘î-i mezbûr Molla Mehmed meblağ-ı mezbûr mutâlebesiyle mezbûr Mustafa’ya bî-vech mu‘ârazadan men‘ birle mâ-vaka‘a bi’t-taleb ketb olundu. Fî 12 S sene 1153. Şuhûdü’l-hâl: el-Hâc Mustafa, Kayıkcı Mustafa, Ali b. Abdullah, Solak Mustafa Çelebi b. el-Hâc Mehmed, Hâfız Yusuf Efendi b. Hâfız Receb, Mehmed Odabaşı