Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 274 Hüküm no: 262 Orijinal metin no: [37a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Abdullah’ın kızı Nefise’ye nafaka takdiri Nafaka Mahmiye-i İstanbul’da Zincirlikuyu kurbünde Ali Paşa-i atîk mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan işbu bâ‘isetü hâzihi’l-vesîka Emine bt. Abdullah nâm hatun meclis-i şer‘-i hatîr-ı lâzımü’t-tevkīrde zevc-i sâbıkı Ali b. el-Hâc Mehmed nâm kimesne mahzarında takrîr-i kelâm ve ta‘bîr ani’l-merâm edip mezbûr Ali’nin firâşından hâsıla ve benden mütevellide hâlâ bi-hakkı’l-hıdâne hacr ve terbiyemde olan işbu kızım Nefise nâm sagīre ve nafaka ve kisveye eşedd-i ihtiyâcı olmağla babası mezbûr Ali üzerine kıbel-i şer‘den kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīre-i mezbûrenin nafaka ve kisve ve sâir levâzım-ı zarûriyesi’çün babası mezbûr Ali üzerine târîhi vesîkadan bi’t-terâzi yevmî ikişer para nafaka ve kisve-bahâ farz ve takdîr buyurup meblağ-ı mefrûz-ı mezkûrun sagīre-i mezbûrenin nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası mezbûr Ali üzerine rücû‘a mezbûre Emine Hatun’a izin birle mâ-vaka‘a bi’t-taleb ketb olundu. Fî 14 S sene 1153. Şuhûdü’l-hâl: Mehmed Çelebi b. İbrahim, Mustafa Çelebi b. Halil, Ali Çelebi b. Abdullah, el-Hâc Mustafa b. Mehmed