Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 274 Hüküm no: 263 Orijinal metin no: [37a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ali’nin boşandığı hanımı Ümmügülsüm’den zevciyet muamelesi talep etmemesi gerektiği Bi-imzâ-i efendi Sulh Mahmiye-i İstanbul’da Ayvansaray kapısı dâhilinde Tokludede mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Ümmügülsüm bt. İbrahim nâm hatun meclis-i şerîf-i enverde sâhib-i hâzihi’l-vesîka el-Hâc Mehmed b. Ali nâm kimesne mahzarında üzerine da‘vâ takrîr-i kelâm edip mezbûr el-Hâc Mehmed zevc-i dâhilim olup bin yüz elli iki senesi Zilka‘detü’ş-şerîfesinin sekizinci günü zimmetinde mütekarrer ve ma‘kūdün-aleyh olan bin beş yüz akçe mehr-i müeccelim ve nafaka-i iddet ve me’ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile hul‘ olduğumda ol dahi hul‘-i mezbûru ba‘de’l-kabûl hukūk-ı zevciyete müte‘allıka da‘vâdan her birimiz âharın zimmetini ibrâ ve ıskāt etmiş idik, el-hâletü hâzihi mezbûr el-Hâc Mehmed yine bana bi-gayr-ı vech-i şer‘î zevciyet mu‘âmelesi murâd eder, suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûr el-Hâc cevâbında husûs-ı mezbûr merkūme Ümmügülsüm’ün takrîr-i meşrûhu üzere olduğunu bi-tav‘ihî ikrâr ve i‘tirâf etmeğin mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 13 S sene 1153. Şuhûdü’l-hâl: Abdullah Çelebi, [37b] Mehmed b. Mustafa, Ahmed Çelebi, el-Hâc Mustafa b. el-Hâc Mehmed, Salih Çelebi b. Süleyman