Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 323 Hüküm no: 467 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem bt. Abdullah’ın kendisine ait evin tasarruf hakkını sattığı Mahmiye-i İstanbul’da Azablar nâm mevzi‘de vâki‘ Elvan[z]âde Mahallesi’nde sâkine Meryem bt. Abdullah nâm menkûhanın sin ve cüssesinin tahammülü olmağla bâliga olup bülûğuna mu‘arrefe olduğu menzil-i âti’l-beyânın hakk-ı tasarrufunu ferağ ve tefvîze ve bedel-i tefvîzi ahz u kabz ve kendüye îsâle zevci Ahmed Beşe b. Mustafa’yı tarafından vekîl eylediği hasm-ı câhid-i şer‘î mahzarında mezbûrenin zâtını ma‘rifet-i şer‘iyye ile ârifân olan Himmet Beşe b. Mehmed ve el-Hâc Mehmed b. el-Hâc Pîrî şehâdetleri ile şer‘an sâbite olan mezbûr Ahmed Beşe vekâleten mahfil-i kazâda işbu râfi‘u’l-kitâb el-Hâc Mustafa b. Mahmud mahzarında bi’l-vekâle ikrâr-ı tâm ve takrîr-i kelâm edip mahmiye-i mezbûrede Timurtaş Mahallesi’nde vâki‘ bir tarafı Abdünnebi pazarbaşı mülkü ve iki tarafı Ali Beşe mülkü ve bir tarafı tarîk-i âm ile mahdûd bir bâb fevkānî ve bir bâb tahtânî odaları ve iki bi’r-i mâyı ve taş duvarı müştemil olup merhûm Cerrâh Mehmed Paşa Vakfı’ndan icâre-i mu‘accele ve ayda altmış beş akçe ücret-i müeccele ile müvekkile-i mezbûre Meryem’in tasarruffunda olan menzil-i mahdûd-ı mezkûrun hakk-ı tasarrufunu vasiyy-i mezbûr mütevellîsi ma‘rifetiyle merkūm el-Hâc Mustafa’ya kırk sekiz bin nakd râyic fi’l-vakt fıddî akçe bedel mukābelesinde vekâletim hasebiyle ferağ [ve] tefvîz edip ol dahi minvâl-i muharrer üzere tefevvüz ve kabûl eyledikden sonra bedel-i mezbûr kırk sekiz bin akçeyi bi’t-tamam yedinden ahz u kabz edip müvekkile-i mezbûreye îsâl eyledim, ba‘de’l-yevm menzil-i mezbûr merkūm el-Hâc Mustafa’nın dâhil-i taht-ı tasarrufu olmuşdur dedikde gıbbe’t-tasdîk ve’t-taleb mâ-vaka‘a ketb ü sebt olundu. Tahrîren fi’l-yevmi’l-mükemmel li’l-ışrîn min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: el-Hâc Mustafa b. Hasan, Mehmed Dede b. Hüseyin, Ramazan Çelebi b. el-Hâc Mustafa, Mehmed Çelebi b. el-Hâc Mustafa, Abdüllatif Çelebi b. Mehmed Dede, Mehmed Beşe b. Süleyman, Davud b. Seydî, Şeyh Mehmed Çelebi b. Musa Efendi, İbrahim Çelebi b. Davud, Pîrî Çelebi b. Hüseyin, Mehmed Çelebi b. Hüseyin.