Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 324 Hüküm no: 468 Orijinal metin no: [69b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Veli ile Mehmed b. Himmet’in muhalaa ile boşandıkları Mahmiye-i İstanbul’da Hızır Bey Mahallesi’nde sâkine Sâliha bt. Veli nâm hatun meclis-i şer‘-i şerîfde zevci olan işbu râfi‘u’l-kitâb Mehmed b. Himmet nâm kimesne muvâcehesinde bi-tav‘ihâ ikrâr u i‘tirâf edip zevcim mezbûr Mehmed ile zimmetinde cihet-i deyn-i şer‘îden olan bin akçe hakkım ve ma‘kūdün-aleyh olan bin altı yüz akçe mehr-i müeccelim ve nafaka-i iddet ve meûnet-i süknâm üzerime olmak üzere muhâla‘a edip her birimiz âharın zimmetini zevciyete vesâir husûsa müte‘allık olan âmme-i de‘âvîden ibrâ ve ıskāt eyledik dedikde mezbûr Mehmed dahi vech-i muharrer üzere zevcesi mezbûre Sâliha ile zimmetinde mezbûreye olan bin akçe deyni ve bin altı yüz akçe mehr-i müeccel ve nafaka-i iddet ve meûnet-i süknâsı üzerine muhâla‘a edip zevciyete vesâir husûsa müte‘allik olan cemî‘ de‘âvîden mezbûreden birbirimizin zimmetlerini ibrâ ve ıskāt eyledik dedikde gıbbe’t-tasâduk mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: Mehmed Efendi b. Ali el-imâm, Hüseyin Halîfe b. Şükrullah el-müezzin, Osman Çelebi er-râcil, İbrahim Çelebi [b.] Davud ve gayruhum.