Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 344 Hüküm no: 344 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın bazı eşyalarını hanımı Hatice Hatun’a sattığı Eşyâ mübâya‘ası Mahmiye-i İstanbul hısnı ebvâbından Eğrikapı kurbünde el-Hâc İlyas mahallesi ahâlîsinden Mehmed Ağa b. Abdullah nâm kimesne meclis-i şer‘-i hatîr-ı lâzımü’t-tevkīrde zevce-i menkûhası bâ‘isetü hâzihi’l-vesîka Hadîce bt. Musli b. Abdullah nâm hatun tarafından zikri âtî husûsu tasdîka vekîl olduğu zât-ı mezbûreyi ârifân el-Hâc Mustafa b. el-Hâc Mehmed es-Seyyid Mustafa Çelebi b. es-Seyyid Hasan nâm kimesneler şehâdetleriyle sâbit olan Molla Hüseyin b. el-Hâc Mehmed nâm kimesne mahzarında ikrâr ve takrîr-i kelâm edip eşyâ-i memlûkemden on kadife yasdık ve üç minder ve üç penbe şilte ve üç yemenî mak‘ad ve bir Mısır hasırımı tarafeynden îcâb ve kabûlü hâvî bey‘-i bâtt-ı sahîh-i şer‘î ile bi-safkatin vâhidetin zevcem müvekkile-i mezbûre Hadîce Hatun’a kırk guruşa bey‘ ve temlîk ve teslîm eylediğimde ol dahi ber-vech-i iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr kırk guruş mutâlebesinden zevcem müvekkile-i mezbûrenin zimmetini ibrâ-i âmm-ı râfi‘ü’l-hısâm ile ibrâ ve ıskāt eyledim ba‘de’l-yevm eşyâ-i muharrere-i mezkûrede kat‘an benim alâka ve medhalim kalmayıp zevcem müvekkile-i mezbûre Hadîce Hatun’un mülk-i müşterâ ve hakk-ı sırfı olmuşdur keyfe mâ teşâ ve tehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 Ra sene 1153. Şuhûdü’l-hâl: es-Seyyid Mustafa Çelebi b. Hasan Ruhalı, İbrahim Çelebi b. Mehmed tâbi‘-i Efendi, Mustafa Efendi Rif‘atîzâde, Mukayyid İbrahim Efendi b. Mustafa, Merhabazâde Mehmed Emin Efendi, es-Seyyid Ömer Efendi b. es-Seyyid Halil, el-Hâc Mustafa Efendi Bursavî, Ömer Efendi b. Nurullah Efendi