Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 345 Hüküm no: 345 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeynelabidin b. Mehmed’in Yeniçeri Nukud Vakfı’ndan borç aldığı (bey‘ bi’l-vefâ) Vilâyet-i Anadolu’da medîne-i Yenişehir mahallâtından el-Hâc Hamza mahallesi ahâlîsinden olup mahmiye-i İstanbul’da müsâfiren sâkin es-Seyyid Zeynelabidin b. es-Seyyid el-Hâc Mehmed nâm kimesne meclis-i şer‘-i şerîf-i nebevîde Dergâh-ı âlî yeniçerilerinin sekizinci cemâ‘atinin odabaşısı ve nukūd-ı mevkūfesinin mütevellîsi olan râfi‘ü’l-vesîka el-Hâc Mehmed Odabaşı b. Ömer muvâcehesinde ikrâr-ı tâm ve takrîr-i kelâm edip yedimde mülk ve hakkım olup mahalle-i merkūmede vâki‘ bir tarafdan ammim es-Seyyid el-Hâc Abdülcelal mülkü ve bir tarafdan karındaşım es-Seyyid Ömer mülkü ve bir tarafdan el-Hâc Caferoğlu el-Hâc Hüseyin mülkü ve bir tarafdan tarîk-i âm ile mahdûd ma‘lûmü’l-müştemilât mülk menzilim ile medîne-i mezbûra tâbi‘ Avşar karyesinde tarafeyni Müftü Efendi el-Hâc Ömer mülkleri ve tarafeyden tarîk-i âm ile mahdûd yedi dönüm mülk bahçeyi ve târîh-i vesîkadan üç ay tamâmına değin bey‘ bi’l-vefâ tarîkı üzere bi-safkatin vâhidetin mütevellî-yi merkūm el-Hâc Mehmed Odabaşı’ya iki yüz on guruşa bey‘ ve mahallerinde her birini kabz ve tasarrufa tarafımdan taslît eylediğimde ol dahi bi’t-tevliye vech-i mübeyyen üzere iştirâ ve kabûl edip semen-i mezkûr iki yüz on guruşu mâl-ı vakf-ı mezbûrdan mütevellî-yi merkūm yedinden ahz u kabz eyledim dedikde gıbbe’t-tasdîkı’ş-şer‘î mezbûr es-Seyyid Zeynelabidin meclis-i şer‘de Mustafa b. Mehmed nâm kimesne mahzarında ikrâr ve takrîr-i kelâm edip bey‘-i mezkûr hakīkatde rehin ve meblağ-ı mezbûr iki yüz on guruşu zimmetimde mütevellî-yi merkūma cihet-i karzdan deyn olmağla meblağ-ı mezbûru va‘demiz hulûlünde edâ edemezsem menzil ve bahçeyi semen-i misilleriyle âhara bey‘e ve kabz-ı semene ve semeninden deyn-i mezkûrumu mütevellî-yi merkūma edâya ve fazla kalırsa kendüye îsâl ve teslîme ve bunların mütevakkıf olduğu umûrun küllîsine küllemâ aziltüke fe-ente vekîlî mazmûnu üzere vekâlet-i devriye-i sahîha ile tarafımdan mezbûr Mustafa’yı vekîl ve nâib-i menâb nasb u ta‘yîn eyledim dedikde ol dahi ber-vech-i muharrer vekâlet-i merkūmeyi kabûl ve merâsimini mahallinde ikāmete ta‘ahhüd etmeğin mâ hüve’l-vâki‘ bi’t-taleb ketb olundu. Fî 3 Ra sene 1153. Şuhûdü’l-hâl: İbrahim Bey b. Mehmed, Ebubekir b. Mehmed, Ahmed b. Yusuf, Hüseyin b. Ebubekir, Mehmed Çelebi b. Ahmed