Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 373 Hüküm no: 380 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer’in emaneten bıraktığı eşyalardan incili kuşak için açtığı davaya sulh bedeli karşılığı son verildiği Ma‘rûz Sâhib-i arzuhâl es-Seyyid el-Hâc Ömer Bâb Mahkemesi’nde meclis-i şer‘de derûn-ı arzuhâlde mezkûrü’l-ism el-Hâc Mehmed muvâcehesinde bundan akdem eşyâ-i memlûkemden bir yorgan ve yedi zirâ‘ bürüncek bez ve on zirâ‘ ipek kenârlı bez ve on altı zirâ‘ çârşeblik bez ve iki döşek çârşebi ve bir hamam peştemâli ve bir havlu makrama ve bir havlu silecek ve bir beyâz anteri ve iki yemenî ve destmâl ve bir sîm sürmedân ve bir sîm pullu kîse ve bir öreke ma‘a kasnak ve iki keten kutusu on altı guruş kıymetli bir incili kuşağımı mezbûr el-Hâc Mehmed’e bi-tarîkı’l-emâne def‘ ve teslîm etmiş idim, hâlâ eşyâ-i mezkûreyi mezbûr el-Hâc Mehmed bana def‘ ü teslîm ben dahi ahz u kabz edip lâkin zikr olunan incili kuşak zimmetinde kalmağla taleb ve da‘vâ eylediğimde ol dahi bilâ-te‘ad zâyi‘ oldu demekle ba‘de’l-münâza‘a sekiz buçuk guruş bedel-i makbûza sulh olduğumdan sonra husûs-ı mezbûra ve sâire müte‘allıka âmme-i da‘vâdan ben mezbûr el-Hâc Mehmed’in ve anası işbu Ümmügülsüm’ün zimmetlerini ibrâ eylediğimde onlar dahi kezâlik benim zimmetimi ibrâ eylediler dedikde her [biri] tasdîk ve kabûl eyledikleri tescîl ve huzûr-ı âlîlerine i‘lâm olundu. Fî 11 min-Zilka‘de sene 1152.