Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 374 Hüküm no: 382 Orijinal metin no: [57b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’ya olan borcun taksitle ödeneceği Ma‘rûz Arzuhâl eden Palaş zimmînin derûn-ı arzuhâlde mezkûr Bostânî Osman Ağa’ya ber-mûceb-i i‘lâm üç yüz altmış guruş deyni olduğu ikrârıyla sâbit oldukdan sonra mezbûr Palaş’ın meblağ-ı merkūmu hâlâ ve def‘aten edâya iktidârı olmayıp taksîte tâlib oldukda merkūm Osman Ağa dahi beher mâh kendüye yüz seksener akçe verip târîh-i i‘lâmdan iki yüz on ay tamâmına değin meblağ-ı merkūm üç yüz altmış guruşu tamâmen edâ etmek üzere mezbûr Palaş’ı taksît ettikde ol dahi kabûl ve meblağ-ı merkūmu müddet-i mezkûre tamâmına değin merkūm Osman Ağa’ya edâya ta‘ahhüd eyledikden sonra mezbûr Palaş’ın zevcesi olup şahsı ta‘rîf-i şer‘î ile mu‘arrefe olan Zevi bt. Yani Nasrâniye beher şehr yüz seksener akçenin edâsına bi’l-emr ve’l-kabûl kefâlet-i sahîha-i şer‘iyye ile kefîl olduğu Mahkeme-i Bâb’da tescîl ve huzûr-ı âlîlerine i‘lâm olundu. Fî 20 Zilka‘de sene 1152.