Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 377 Hüküm no: 388 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dışardan gelen tavukların Sultan Bayezid Camii avlusundan başka yerden satılmaması Bâ-mühr-i efendi Ma‘rûz Ashâb-ı arzuhâl tavukçu esnafının kethüdâları İbrahim ve yiğitbaşıları diğer İbrahim ve el-Hâc Ahmed ve İsmail ve Abdullah nâm kimesneler ile hırfet-i mezbûreden on neferden mütecâviz zimmîler meclis-i şer‘de her biri bâlâda derkenâr olunan fermân-ı âlîşân mantûku üzere ve taşradan gelen Sultan Bayezid-i Veli Câmi‘-i şerîfi havlusuna gelip kethüdâ ve yiğitbaşı ve sâir ustalar ma‘rifetleriyle Matbah-ı âmireye kifâyet mikdârı verildikden sonra seksen dört hisse i‘tibâriyle seksen hissesi Müslim ve zimmî ustaların ve dört hissesi Yahûdi tâifesine narhı üzere tevzî‘ ve taksîm olunagelip yedimizde olan müte‘addid senedâtımız mûceblerince taşradan metâ‘ımızı karşılayıp alanlar ve hufyeten yağhânelerde gizleyip hufyeten bey‘ edenler bi’d-defa‘ât men‘ ü def‘ olunmuşlar iken yine ba‘zıları taşradan devâbla ve denizden sefîne ile gelip metâ‘ımız olan tavuğu esnafımız varmaksızın ber-minvâl-i muharrer bey‘ ü şirâ etmeleriyle esnafımıza gadr ve nizâmımıza halel gelmişdir deyü takrîrleri üzere müte‘addid senedât ibrâz edip ve ba‘de’l-yevm berren ve bahren tüccârın getirdikleri tavukları bi’l-cümle esnaf muvâcehesinde ashâbı ile bazar edip kadr-ı kifâye Matbah-ı âmire tarafına verildikden sonra mâ‘adâsı tavukçu esnafı beynlerinde olageldiği üzere tevzî‘ ve taksîm olunup âhardan koltukçu ve yağcı ve yumurtacı ve sâir bunların metâ‘larını ahz eder olur ise hilâf-ı nizâmları men‘ olunması bâbında sa‘âdetlü vezîr-i mükerrem yeniçeri ağası hazretlerine fermân-ı âlîleri ihsân olunması ricâsında oldukları huzûr-ı âlîlerine i‘lâm olundu. Fî 22 min-Zilka‘deti’ş-şerîfe sene 1152.