Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 330 Hüküm no: 477 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayram v. İvaz’ın vârislerinden kızı Saltana’nın bir mikdar para karşılığında terekedeki hakkından vazgeçtiği Mahmiye-i İstanbul’da Samadya kapısı dâhilinde Bayrakdar Mahallesi’nde sâkin olup bundan akdem hâlik olan Bayram v. İvaz nâm Ermeninin verâseti zevce-i metrûkesi Despina bt. Miyer ve sulbiye kebîre kızı Saltana nâm hatunlara ve sulbî sagīr oğulları Bazar ve Tanrıverdi’ye münhasıra olduğu sâbit ve müte‘ayyen oldukdan sonra mezbûre Saltana mahfil-i şer‘-i şerîfde mezbûre Despina kendi tarafından asîl ve sagīrân-ı mezbûrânın tesviye-i umûrlarına vasiyy-i mansûbeleri olmağla muvâcehesinde ikrâr-ı tâm ve bast-ı merâm edip babam hâlik-i mezbûrun mahalle-i mezbûrede vâki‘ beyne’l-ahâlî ve’l-cîrân ma‘lûmü’l-hudûd olan menzilinden vesâir muhallefâtından hisse-i şer‘iyyem mukābelesinde tehârüc-i şer‘î vechi üzere mezbûre Despina asâlet ve vesâyeti hasebiyle muhallefât-ı mezbûreye vâzı‘atü’l-yed olmağın yedinden iki bin akçe ahz u kabz edip tereke-i mezbûreye müte‘allika da‘vâm kalmamışdır, da‘vâ dahi edersem lede’l-hükkâmi’l-kirâm istimâ‘ olunmaya dedikde sulh-i mezbûr cânib-i sagīrâna enfa‘ olmağın mukırra-i mezbûreyi mezbûre Despina kelimât-ı meşrûhasında tasdîk etmeğin mâ-vaka‘a bi’t-taleb ketb olundu. Fî-evâili Zilhicceti’ş-şerîfe li-sene erba‘a ve sittin ve elf. Şuhûdü’l-hâl: Süleyman Beşe b. Ebîbekir, Pîrî Beşe b. Hüseyin, Mehmed Çelebi b. Hüseyin, İbrahim Çelebi b. Davud, Rıdvan b. Abdullah ve gayruhum.