Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 331 Hüküm no: 476 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısır kadılarından Abdülvehhab Efendi’nin hayatta iken ticaret için el-Hâc Nimetullah’a verdiği parayı vârislerinin tamamen aldığı Husûs-ı âti’r-rakīm mahallinde ketb ü terkīm olunması iltimâs olunmağın savb-ı şer‘-i kavîmden mevlânâ Abdulkādir Efendi irsâl olunup ol dahi mahmiye-i İstanbul’da Papasoğlu hanında Trab[l]usî ile el-Hâc Ali Efendi b. Salih’in odasına varıp zeyl-i kitâbda mastûrü’l-esâmî olan Müslimîn huzûrlarında akdeylediği meclis-i şer‘-i şerîfde kuzât-ı Mısriyye’den olup mahmiye-i mezbûre mahallâtından Haydarpaşa Mahallesi’nde sâkin iken bundan akdem vefât eden merhûm Abdülvehhab Efendi b. Şehabeddin Efendi’nin bi’l-inhisâr vârisleri olan sulbî kebîr oğlu Mustafa Çelebi asâleten ve Bender-i Reşid’de sâkine olup müteveffâ-i mezbûrun zevce-i metrûkesi olan vâlidesi Sâliha bt. Abdullah tarafından husûs-ı âti’z-zikre vekîl olup ol dahi hasm-ı câhid mahzarından Seydî Yusuf b. Abdullah ve Seydî Mehmed b. Şehabeddin şehâdetleri ile şer‘an sâbite olmağın vekâleten mahalle-i mezbûrede sâkine olan zevce-i uhrâsı Fâtıma bt. el-Hâc Mehmed tarafından dahi mezbûr el-Hâc Ali Efendi ile merkūm Mustafa Çelebi şehâdetleri ile şer‘an vekâleti sâbite olan el-Hâc Ahmed b. Said vekâleten işbu bâ‘isü’l-kitâb el-Hâc Nimetullah b. el-Hâc Şehab mahzarında herbiri ikrâr ve takrîr-i kelâm edip müteveffâ-i mezbûr Abdülvehhab Efendi’nin mezbûr el-Hâc Nimetullah’a hâl-i hayâtında emânet vaz eylediği yüz aded sikke-i hasene İstanbul’da bey‘ edivermek için Mısır’dan irsâl eylediği mikdârı beynimizde ilm-i şer‘î ile ma‘lûm nişadır ve kahve bahâsından otuz bin dört yüz akçe olup vefât eyledikde mezbûr el-Hâc Nimetullah’dan zikr olunan yüz aded sikke-i hasene ile meblağ-ı mezbûr otuz bin dört yüz akçeden mezbûr Mustafa Çelebi kassâm-ı askerî defterinden bana ta‘yîn olunan yüz aded sikke-i hasene ile yirmi bin dokuz yüz akçeyi vâlidesi müvekkile-i mezbûre Sâliha’ya ta‘yîn olunan dört bin yedi yüz elli akçeyi asâleten ve vekâleten ben ahz u kabz eyledim deyip ve vekîl-i mezbûr el-Hâc Ahmed dahi müvekkilesi mezbûre Fâtıma’ya ta‘yîn olunan dört bin yedi yüz elli akçeyi vekâletim hasebiyle ben ahz u kabz eyledim deyip mezbûr el-Hâc Nimetullah’da meblağ-ı mezbûrdan bir akçe ve bir habbe bâkī kalmayıp târîh-i kitâba gelince cemî‘ de‘âvî ve mutâlebât ve eymân ve muhâsamâtdan zimmetini ibrâ-i âmm-ı kātı‘u’n-nizâ‘ ile asâleten ve vekâleten herbirimiz ibrâ ve ıskāt eyledik mezbûr el-Hâc Nimetullah ile min-ba‘d da‘vâ ve nizâ‘ımız kalmadı, ba‘de’l-yevm bizden ve müvekkiletândan mezbûretândan merkūm el-Hâc Nimetullah üzerine da‘vâ ederse lede’l-hükkâmi’l-kirâm istimâ‘ olunmaya dediklerinde gıbbe’t-tasdîk ve’t-taleb vâki‘ hâli mevlânâ-yı mezbûr mahallinde tahrîr ba‘dehû cânib-i şer‘den ma‘an irsâl olunan Hüseyin Beşe b. Abdullah ve Kulu nâm kimesneler ile gelip meclis-i şer‘de vukū‘u üzere inhâ ve takrîr etmeğin mâ-hüve’l-vâki‘ bi’t-taleb ketb olundu. Tahrîren fî-gurreti Zilhicceti’ş-şerîfe li-sene erba‘a ve sittin ve elf. Şuhûdü’l-hâl: el-Hâc Ali Efendi b. Salih et-Trablusî, el-Hâc Selim b. Cum‘a, el-Hâc Yusuf b. Said, el-Hâc Ali b. Said el-müezzin, Mehmed Çelebi b. Said, Ebûbekir Reis b. Salim, eş-Şeyh Yusuf b. Mehmed ve gayruhum.