Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 380 Hüküm no: 394 Orijinal metin no: [58b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Yusuf’u katleden Hüseyin’in varislere diyet ödemesi Ma‘rûz Hoca Paşa mahallesi ahâlîsinden olup bundan akdem katîlen vefât eden Mustafa b. el-Hâc Yusuf b. Abdullah’ın verâseti zevce-i menkûha-i metrûkesi Âişe bt. el-Hâc Halil ve anası Saliha bt. el-Hâc Ali nâm hatunlar ile sulbî sagīr oğlu İsmail’e ve zevce-i mezbûrenin batnında mütebeyyen hamle münhasıra ve tashîh-i meselesi kırk sekiz sehmden olup sihâm-ı mezbûreden altı sehmi zevce-i mezbûre Âişe’ye ve sekiz sehmi anası mezbûre Saliha’ya ve bâkī on yedişer sehmi sagīr-i mezbûr İsmail ile haml-i mezbûrdan her birine isâbeti tahakkukundan sonra mezbûre Âişe Hatun ile kendiden asîle ve sagīr-i mezbûrun min-kıbeli’l-ebb ceddesi ve vasiye-i mansûbesi mezbûre Saliha Hatun asâleten ve vesâyeten Bâb Mahkemesi’nde meclis-i şer‘de Kayıkcı tâifesinden olup Mumcu Ali Beşe mübâşeretiyle ihzâr ettirdikleri Hüseyin b. Hasan mahzarında mezbûr Hüseyin işbu târîh-i i‘lâm senesi Şevvâlü’l-mükerreminin on birinci günü Havâss-ı refî‘a kazâsı muzâfâtından Hasköy kasabasında Kiremidciler kurbünde vâki‘ iskelede merbût ismi ma‘lûmumuz olmayan bir zimmînin çekeleve ta‘bîr olunur sefînesinde ba‘de’l-asr âlet-i cârihadan kara kabzalı kasab bıçağı ile amden mûrisimiz mezbûr Mustafa’yı boğazının üç yerinden darb ve cerh edip ol cerhden nâşi mûrisimiz mezbûr yirmi bir gün mürûrunda müteessiren fevt olmuşdur deyü asâleten ve vesâyeten mûcib-i şer‘îsini da‘vâ eylediklerinde mezbûr Hüseyin dahi fi’l-vâki‘ müdde‘iyetân-ı mezbûretânın mûrisleri müteveffâ-yı mezbûr Mustafa’yı târîh-i mezbûrda zikr olunan sefînede kara kabzalı kasab bıçağı ile boğazının üç yerinden darb ve cerh eylediğini ikrâr lâkin cerh-i mezkûrdan nâşi müteessiren fevt olduğunu inkâr etmeğin müdde‘iyetân-ı mezbûretândan ber-vech-i muharrer müdde‘âlarını lede’t-tezkiye adâletleri zâhir olan Mehmed Ağa b. İsmail ve Ahmed Ağa b. Mehmed nâm kimesneler şehâdetleriyle sâbit oldukdan sonra katl-i mezbûrun mûcib-i kısâs olup müdde‘iyetân-ı mezbûretân Âişe ve Saliha hatunlar biz kısâs ettirmeziz deyüp kısâsdan afv edip diyet taleb etmekle mezbûretânın diyetden dahi hissesi sâkıta olup mâ‘adâ veresenin hakkı mâla münkalib olmağla diyet-i kâmileden sagīr-i mezbûr İsmail ile haml-i merkūmdan her birine ber-mûceb-i tashîh-i mezkûr on yedişer sehmlerine isâbet eden meblağı vasiye-i mezbûreye vech-i şer‘î üzere edâya kātil-i merkūm Hüseyin’e tenbîh olunduğu huzûr-ı âlîlerine i‘lâm olundu. El-emru li-men-lehü’l-emr. Fî 23 Zilka‘de sene 1152.