Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 332 Hüküm no: 480 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden el-Hâc Hüseyin Efendi’nin hayatta iken ticaret için es-Seyyid Mehmed Efendi’ye verdiği paradaki hakkını, vârislerden Hatice’nin tamamen aldığı <> Diyâr-ı Mısriyye’de sugr-ı Reşid’de sâkin iken bundan akdem vefât eden merhûm el-Hâc Hüseyin Efendi’nin verâseti zevce-i metrûkesi Emine bt. ( ) nâm hatuna ve sulbiye kebîre kızları Hadice ve Sittine nâm hatunlara ve li-ebeveyn kız karındaşı oğulları olan beş nefer kimesnelere münhasıra olup kable’l-kısmet mezbûre Sittine dahi müteveffât olup verâseti vâlidesi mezbûre Emine’ye ve li-ebeveyn kız karındaşı mezbûre Hadice’ye ve li-ebeveyn ammi oğulları olan mezbûrûn beş nefer kimesnelere münhasıra olup meblağ-ı âti’l-beyânın üç yüz altmış sehmden seksen beş sehmi mezbûre Emine’ye ve yüz seksen sehmi mezbûre Hadice’ye ve doksan beş sehmi dahi asebât-ı mezkûreye isâbet eylediği bi-hükmi’l-münâsaha şer‘an mütebeyyen oldukdan sonra mezbûre Hadice tarafından zikrolunan yüz seksen sehm mukābelesinde meblağ-ı âti’z-zikrden isâbet eden hakkını ahz u kabz ve kendüye îsâle ve ibrâya vekîl olup vekâleti hasm-ı câhid-i şer‘î mahzarında mezbûre Hadice’nin zâtını ma‘rifet-i şer‘iyye ile ârifân olan el-Hâc Mehmed b. Şehabeddin ve Seydî Yusuf b. Abdullah şehâdetleri ile şer‘an sâbite olan zevci Mustafa Çelebi b. Abdülvehhab Efendi mahfil-i kazâda hâlâ hacc-ı şerîfde olan Reşidî es-Seyyid Mehmed Efendi tarafından zikri âti’l-meblağı def‘ ve teslîme ve ikrâr-ı âti’l-beyânı tasdîka vekîl-i sâbitü’l-vekâlesi olan işbu râfi‘u’l-kitâb Mustafa Bey b. Abdullah mahzarında bi’l-vekâle ikrâr-ı tâm ve takrîr-i kelâm edip müteveffâ-i evvel mezbûr el-Hâc Hüseyin hâl-i sıhhatinde müvekkil-i mezbûr es-Seyyid Mehmed Efendi’ye İstanbul’da bey‘ edivermek için Reşid’den irsâl eylediği mikdârları ilm-i şer‘î ile beynimizde ma‘lûm olan keten ve pirinç bahâsından müvekkil-i mezbûr es-Seyyid Mehmed Efendi’den bâkī kalan sekiz yüz otuz iki buçuk ve bir sümün riyâl guruşdan sihâm-ı mezbûre mukābelesinde müvekkile-i merkūme Hadice’ye isâbet eden dört yüz on altı guruş ve bir rub‘ ve nısf sümün hakkını vekâletim hasebiyle vekîl-i mezbûr Mustafa Bey’den bi’t-tamam ve’l-kemâl ahz u kabz edip meblağ-ı mezbûra müte‘allik da‘vâdan müvekkil olan merkūm es-Seyyid Mehmed Efendi’nin zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim, müvekkile-i mezbûrenin min-ba‘d da‘vâ ve nizâ‘ı kalmadı dedikde gıbbe’t-tasdîk ve’t-taleb mâ-vaka‘a ketb olundu. Fi’l-yevmi’r-râbi‘ min-Zilhicceti’ş-şerîfe li-sene erba‘a ve sittin ve elf. Şuhûdü’l-hâl: el-Hâc Ali Efendi b. Salih Trablusî, Selim Çelebi b. el-Hâc Kasım, el-Hâc Selim b. Cum‘a, el-Hâc Yusuf b. Said, el-Hâc Nimetullah b. Şehabeddin, Ali Çelebi b. Zülfikār ve gayruhum.